ఆర్టికల్ 370 రద్దు అనంతరం కశ్మీర్లో పరిస్థితులను ఎప్పటికప్పుడు చైనా గమనిస్తోందని ఆ దేశాధ్యక్షుడు షీ జిన్పింగ్ పదేపదే చెబుతూనే ఉన్నారు. అయితే చైనా అధ్యక్షుడి వ్యాఖ్యలపై తాజాగా మోదీ ప్రభుత్వాన్నివిమర్శించింది హస్తం పార్టీ. కశ్మీర్ను గమనిస్తున్నామని జిన్పింగ్ చెబుతుంటే... భాజపా సర్కారు హాంకాంగ్ గురించి ఎందుకు మాట్లాడటం లేదని ప్రశ్నించింది. హాంకాంగ్లో చైనాకు వ్యతిరేకంగా తీవ్ర ఆందోళనలు చెలరేగుతున్నాయి. ఈ పరిస్థితుల్లో భారత్ కూడా హాంకాంగ్ను గమనిస్తోందని జిన్పింగ్కు మోదీ సర్కారు ఎందుకు చెప్పలేకపోతోందని విమర్శించింది.
భారత్ అంతర్గత విషయాలలో చైనా తలదూర్చకుండా అడ్డుకోవడంలో మోదీ ప్రభుత్వం విఫలమైందని కాంగ్రెస్ అధికార ప్రతినిధి మనీశ్ తివారీ ఆరోపించారు.
"కశ్మీర్ను గమనిస్తున్నట్లు చైనా అధ్యక్షుడు షీ జిన్పింగ్ చెబుతున్నారు. అయితే హాంకాంగ్లో జరుగుతున్న ప్రజా నిరసనలు, జింజియాంగ్లో మానవహక్కుల ఉల్లంఘన, దక్షిణ చైనా సముద్రం, టిబెట్లో జరుగుతున్న అణచివేత వంటి విషయాలను తాము కూడా గమనిస్తున్నట్లు మోదీ ప్రభుత్వం, విదేశీ వ్యవహారాల శాఖ ఎందుకు చెప్పడం లేదు."
- మనీశ్ తివారీ, కాంగ్రెస్ అధికార ప్రతినిధి
ఆక్సాయిచిన్ గురించి మాట్లాడండి
అలాగే మోదీ సర్కారుకు ధైర్యముంటే.. పాక్ అక్రమంగా చైనాకు అప్పగించిన అక్సాయిచిన్ గురించి జిన్పింగ్తో మాట్లాడాలని తివారీ ట్వీట్ చేశారు.
"పాక్ ఆక్రమిత కశ్మీర్, గిల్గిట్-బాల్టిస్థాన్ను తిరిగి చేజిక్కించుకోవడంపై భాజపా నేతలందరు గొప్పగా మాట్లాడుకుంటున్నారు, కానీ 1963లో పాకిస్థాన్ అక్రమంగా చైనాకు అప్పగించిన ఆక్సాయిచిన్ ప్రాంతాన్ని తిరిగి స్వాధీనం చేసుకోవడంపై ఒక్కరూ మాట్లాడటం లేదు. ఆక్సాయిచిన్ తిరిగి తీసుకోవడంపై జిన్పింగ్తో ప్రధాని మోదీ మాట్లాడతారా?"
-కాంగ్రెస్ నేత మనీశ్ తివారీ
