జమ్ముకశ్మీర్లోని కొన్ని ప్రాంతాల్లో లాండ్లైన్ సేవలను పునరుద్ధరించారు. శ్రీనగర్లోని వందలాది మంది ప్రజలు తమ బంధువులతో మాట్లాడటానికి లాండ్లైన్ కోసం క్యూలో నిలబడుతున్నారు. మొబైల్ ఫోన్లు వచ్చాక ప్రజా టెలిఫోన్ (పీసీఓ), లాండ్లైన్ వాడకం తగ్గిపోయింది. కశ్మీర్లో ప్రస్తుత పరిస్థితులతో వీటికి మళ్లీ డిమాండ్ పెరిగింది.
గత నెలలో ఆర్టికల్ 370 రద్దు బిల్లును పార్లమెంట్లో ప్రవేశపెట్టడానికి కొన్ని గంటల ముందు కశ్మీర్లో మొబైల్, ఇంటర్ నెట్ సేవలను నిలిపివేసింది కేంద్రం. ప్రసుత్తం కొన్ని ప్రాంతాల్లో మాత్రమే ఈ సేవలను పునరుద్ధరించింది. ల్యాండ్లైన్ అందుబాటులో లేని వారు ప్రజాటెలిఫోన్ల ముందు క్యూ కడుతున్నారు. దీంతో మొబైల్ ఫోన్ల వినియోగం లేని పాత రోజులు గుర్తుకొస్తున్నాయి. ప్రజా టెలిఫోన్లు రద్దీగా మారాయి.
శ్రీనగర్లో ఓ స్థానికుడు దూర ప్రాంతాల్లో ఉన్న వారితో మాట్లాడేందుకు రెండు ల్యాండ్లైన్లను ఏర్పాటు చేశాడు. తమ బంధువులతో మాట్లాడటానికి అతని ఇంటికి వందల మంది ప్రజలు వస్తున్నారు. రద్దీ ఎక్కువగా ఉండటం వల్ల వారి నుంచి కొంత డబ్బు తీసుకోవడం మొదలుపెట్టాడు.
"ఎక్కువ మంది రావటం వలన వారిని నిలువరించలేకపోయాం. కొంత మంది కాల్ చేయటం కోసం గొడవ పడ్డారు. చివరికి వారి నుంచి కొంత రుసుము తీసుకోవాలనుకున్నాను."
-లాండ్లైన్ యజమాని.
టెలిఫోన్ అవసరం ఎక్కువగా ఉండటం వల్ల కశ్మీర్ ప్రభుత్వం అన్ని పోలీస్ స్టేషన్లల్లో ఉచిత టెలిఫోన్ సేవలను అందుబాటులో ఉంచింది.
బీఎస్ఎన్ఎల్ కార్యాలయానికి కొత్తగా ల్యాండ్లైన్ సేవల కోసం వందల దరఖాస్తులు వస్తున్నట్లు అధికారులు తెలిపారు. వాటిని పరిశీలించాక సేవలను అందించగల ప్రదేశాలలో త్వరలో కొత్తవి ఏర్పాటు చేస్తామని చెప్పారు.
ఇదీ చూడండి:'విక్రమ్' తొలి కక్ష్య విజయవంతంగా తగ్గింపు
