భారత్లో ఎక్కువ మంది విద్యార్థులు చదువుకునే విధంగా మార్గదర్శకాలు రూపొందించడం సహా కొవిడ్ కారణంగా విదేశాల్లో చిక్కుకున్న విద్యార్థులు సురక్షితంగా స్వదేశానికి చేరుకునేందుకు సలహాలు ఇచ్చే విధంగా ఓ కమిటీని ఏర్పాటు చేసినట్లు కేంద్ర మానవ వనరుల అభివృద్ధి శాఖ మంత్రి రమేశ్ పోఖ్రియాల్ వెల్లడించారు.
గతేడాది 7.5 లక్షల మంది భారతీయులు ఇతర దేశాల్లో విద్యనభ్యసించేందుకు వెళ్లారని... దీనివల్ల విదేశీ మారకం సహా ప్రతిభావంతులైన విద్యార్థులు కూడా భారత్ నుంచి బయటకు వెళ్తున్నట్లు రమేశ్ పేర్కొన్నారు. ఈ నేపథ్యంలో ప్రతిభావంతులందరూ ఇక్కడే చదువుకునేలా అన్ని ప్రయత్నాలు చేయాలని అన్నారు.
"ప్రస్తుత కొవిడ్-19 పరిస్థితి కారణంగా విదేశాలలో చదువుకోవాలనుకున్న చాలా మంది విద్యార్థులు వెనకడుగు వేస్తున్నారు. వీరిలో చాలా మంది భారతదేశంలోనే చదువుకోవాలని నిర్ణయించుకుంటున్నారు. చదువు పూర్తవుతుందో లేదో అనే భయంతో దేశానికి తిరిగివచ్చే భారతీయ విద్యార్థుల సంఖ్య కూడా పెరుగుతోంది. ఈ రెండు వర్గాల విద్యార్థుల అవసరాలను తీర్చడానికి అన్ని ప్రయత్నాలు చేయాలి. భారతదేశంలోని ప్రధాన సంస్థలలో తగిన అవకాశాలను కల్పించి వీరు ఇక్కడే చదువుకునే సదుపాయాలు ఏర్పాటు చేయాలి. విదేశాల నుంచి తిరిగి వచ్చే విద్యార్థుల ఆందోళనలను సైతం పరిష్కరించాల్సిన అవసరం ఉంది."
-రమేశ్ పోఖ్రియాల్, కేంద్ర మానవ వనరుల అభివృద్ధి శాఖ మంత్రి
ప్రభుత్వం ఇచ్చిన హామీ ప్రకారం 2024 నాటికి భారత్లోని అత్యున్నత విద్యాసంస్థల్లో సీట్ల సామర్థ్యాన్ని 50 శాతం పెంచాల్సి ఉందన్నారు కేంద్రమంత్రి పోఖ్రియాల్. అంతేకాకుండా అత్యున్నత విద్యాసంస్థల సంఖ్యను 2024 కల్లా 50కి పెంచాల్సి ఉందని చెప్పారు.
15 రోజుల్లో నివేదిక
యూనివర్సిటీ గ్రాంట్స్ కమిషన్ ఛైర్మన్ అధ్యక్షతన ఏర్పాటైన ఈ కమిటీ.. దేశంలో విశ్వవిద్యాలయాలు మెరుగైన పనితీరు కనబర్చేందుకు అవసరమైన సిఫార్సులు చేయనుంది.
మల్టీ డిస్ప్లినరీ ప్రోగ్రామ్లు, ఉమ్మడి డిగ్రీ కార్యక్రమాలు, క్రాస్-కంట్రీ సెంటర్లు, అత్యుత్తమ విదేశీ ఫ్యాకల్టీ చేత ఆన్లైన్ లెక్చర్లు, విద్యా రంగాన్ని పరిశ్రమతో అనుసంధానం చేయడం వంటి అంశాలపై ఈ కమిటీ అన్వేషణ సాగిస్తుందని అధికారులు తెలిపారు. 15 రోజుల్లోగా ఈ కమిటీ తన నివేదిక అందజేస్తుందని వెల్లడించారు.
ఇదీ చదవండి- రాజ్భవన్లో 'రాజ'కీయం- అసెంబ్లీ సమావేశం కోసం ధర్నా
