మాస్కుల ఉపయోగంలో ఈ జాగ్రత్తలు తప్పనిసరి..!

భారత్​లో కరోనా కేసులు నమోదవుతుండటం వల్ల వైరస్ వ్యాప్తి చెందకుండా ఉండేందుకు ప్రతి ఒక్కరూ మాస్కులు ధరించడం తప్పనిసరి అయ్యింది. ఈ నేపథ్యంలో వాటిని ఉపయోగించేందుకు తీసుకోవాల్సిన జాగ్రత్తలేమిటో తెలుసుకుందాం.

కరోనాపై పోరాటంలో మాస్కులు ధరించడం ఒక ముఖ్యమైన భాగం. వాటిని ఎలా ఉపయోగించాలంటే..

• ముక్కు, నోటి గుండా వైరస్‌ శరీరంలోకి వెళ్లకుండా మాస్కులు పెట్టుకోవడం మంచిది.
• మాస్కులు సరి చేసుకోవడానికి పదేపదే ముఖాన్ని తాకకూడదు. తాకడం వల్ల వైరస్‌ ముప్పు పెరుగుతుంది.
• మాస్కులు పెట్టుకునే ముందు, వాటిని ముట్టుకున్న తర్వాత, వాడి పారేసిన తర్వాత చేతులను సబ్బు లేదా శానిటైజర్లతో కడుక్కోవడం తప్పనిసరి.
• నోరు, ముక్కును పూర్తిగా కప్పివేసినట్లు మాస్కు పెట్టుకోవాలి. ఎక్కడా ఖాళీలుండకూడదు.
• మాస్కును వెనుక నుంచి మాత్రమే తీయాలి. ముందుభాగాన్ని ముట్టుకోవద్దు.