దిల్లీ జామియా మిలియా ఇస్లామియా విశ్వవిద్యాలయంలో హింసాయుత ఆందోళనలకు సంబంధించి దాఖలైన పిటిషన్పై విచారణ చేపట్టేందుకు ఆ రాష్ట్ర హైకోర్టు అంగీకరించింది. వర్సిటీలో జరిగిన ఘటనపై నిజనిర్ధరణ కమిటీ ఏర్పాటు చేయాలన్న వ్యాజ్యంపై గురువారం వాదనలు వింటామని స్పష్టం చేసింది.
న్యాయవాది రిజ్వాన్ ఈ పిటిషన్ను దాఖలు చేశారు. "పౌరసత్వ చట్టానికి వ్యతిరేకంగా జామియా విశ్వవిద్యాలయంలో విద్యార్థులు, అధ్యాపకులు శాంతియుతంగా నిరసన తెలుపుతుండగా.. వారిలో అసాంఘిక శక్తులు ఉన్నాయన్న నెపంతో పోలీసులు విచక్షణారహితంగా దాడి చేశారు. ఈ ఘటనలో విద్యార్థులు తీవ్రంగా గాయపడ్డారు. క్షతగాత్రుల్లో యువతులే ఎక్కువ సంఖ్యలో ఉన్నారు" అని వ్యాజ్యంలో పేర్కొన్నారు.
సుప్రీం, హైకోర్టు మాజీ న్యాయమూర్తులతో...
సుప్రీం కోర్టు, హైకోర్టు మాజీ న్యాయమూర్తులు సభ్యులుగా నిజనిర్ధరణ కమిటీని ఏర్పాటు చేయాలని రిజ్వాన్ కోరారు. నిజనిర్ధరణ కమిటీ నివేదిక వచ్చే వరకు విద్యార్థులపై ఎలాంటి కేసులు నమోదు చేయొద్దని, ఒకవేళ ఇంతకు ముందు కేసులు నమోదు చేస్తే తదుపరి చర్యలకు ఉపక్రమించకుండా పోలీసులకు ఆదేశాలు ఇవ్వాలని దిల్లీ హైకోర్టును కోరారు పిటిషనర్. విశ్వవిద్యాలయం లోపలకు పోలీసులు ఇష్టానుసారంగా రాకుండా చూడాలన్నారు. పోలీసుల దాడిలో గాయపడ్డ విద్యార్థులకు వైద్యం కోసం పరిహారం చెల్లించేలా దిల్లీ ప్రభుత్వం, పోలీసులను ఆదేశించాలని రిజ్వాన్ అభ్యర్థించారు.
ఈ నెల 15న పౌరసత్వ చట్టానికి వ్యతిరేకంగా చేపట్టిన ఆందోళనలు జామియా వర్సిటీలో తీవ్ర హింసకు దారితీశాయి. ఈ ఘటన సహా దేశవ్యాప్తంగా జరిగిన హింసపై సీబీఐ లేదా సిట్ దర్యాప్తు కోరుతూ కొందరు మంగళవారం సుప్రీంకోర్టును ఆశ్రయించారు. ఆ పిటిషన్లను న్యాయస్థానం తోసిపుచ్చింది. సంబంధిత హైకోర్టులను ఆశ్రయించాలని సూచించింది.
ఇదీ చూడండి:'నిర్భయ' దోషి రివ్యూ పిటిషన్ కొట్టివేత
