ఉత్తరాఖండ్ జలప్రళయంలో నష్టపోయిన బాధితులను పరామర్శించారు ఆ రాష్ట్ర మాజీ ముఖ్యమంత్రి హరీశ్ రావత్, కాంగ్రెస్ రాష్ట్ర అధ్యక్షుడు ప్రీతమ్ సింగ్. అక్కడి పరిస్థితులను పరిశీలించి.. భయబ్రాంతులకు గురైన రైనీ గ్రామ ప్రజలను ఓదార్చారు. అనంతరం.. పిపల్కోటి, జోషిమఠ్లోని ప్రజలకు తాత్కాలిక పునరావాస కేంద్రాలు కల్పించాలని ప్రభుత్వాన్ని కోరారు.
'ప్రభుత్వం స్పందించాలి'
ఇంత పెద్ద విపత్తు సంభవించినప్పటికీ బాధిత ప్రజలకు ఎలాంటి సహాయం అందలేదని హరీశ్ రావత్ ఆరోపించారు. రైనీ గ్రామంపై ఉండే నందా దేవీ నదికి ఇతర కాలువలు కలవడం వల్ల.. అక్కడ పెద్ద సరస్సు ఏర్పడిందని రావత్ పేర్కొన్నారు. రాష్ట్రంలో హిమనీనదాలు చాలా ప్రమాదకరమైన స్థితిలో ఉన్నాయని ఈ సందర్భంగా చెప్పారు మాజీ సీఎం. ఈ సంఘటనను ఓ హెచ్చరికగా భావిస్తూ.. ప్రభుత్వం ఇప్పటికైనా మిగిలిన హిమనీనదాలను నిశితంగా పర్యవేక్షించాలన్నారు.
ప్రీతమ్ సింగ్ ఏమన్నారంటే?
ప్రస్తుత విపత్కర పరిస్థితులను దృష్టిలో ఉంచుకొని.. ఈ గ్రామ ప్రజలకు తక్షణమే పునరావాసం కల్పించాలని ప్రభుత్వాన్ని కోరారు కాంగ్రెస్ రాష్ట్ర అధ్యక్షుడు ప్రీతమ్ సింగ్. రైనీ గ్రామంలో బాధిత ప్రజలకు తమ పార్టీ.. భోజన వసతి కల్పించిందని, అనేక ఇతర ప్రదేశాలలోనూ శిబిరాలు ఏర్పాటు చేశామని ఆయన పేర్కొన్నారు.
గత ఆదివారం(ఫిబ్రవరి 7న) హిమనీనదం సృష్టించిన జలప్రళయంలో రిషిగంగ నదికి భారీ వరదలు పోటెత్తాయి. ఈ ఘటనలో సమీపంలోని రైనీ గ్రామప్రజలు తీవ్రంగా నష్టపోయారు. ఆ తర్వాత మలారీ రహదారిపై ఓ వంతెన కూలిపోవడం వల్ల.. సుమారు 13 గ్రామాలపై తీవ్ర ప్రభావం ఏర్పడింది. ఈ విషాద ఘటనలో ఇప్పటివరకు 32 మంది మృతిచెందారు. సొరంగంలో చిక్కుకున్న వారిని రక్షించేందుకు జోరుగా సహాయక చర్యలు కొనసాగుతున్నాయి. ఆర్మీ, ఐటీబీపీ, ఎన్డీఆర్ఎఫ్, ఎస్డీఆర్ఎఫ్, విపత్తు నిర్వహణ బృందాలు, పోలీసు సిబ్బంది సహాయక చర్యల్లో పాల్గొంటున్నారు.
ఇదీ చదవండి: ఆటంకాలు ఎదురైనా.. జోరుగా సహాయక చర్యలు
