లాక్‌డౌన్‌ కారణంగా ఇంట్లో ఉంటూనే చాలా మంది ఔత్సాహికులు తమలోని ప్రతిభను వెలికితీస్తున్నారు. కర్ణాటకకు చెందిన ఓ ఉపాధ్యాయుడు వాడిపారేసిన ప్లాస్టిక్ వస్తువులను.. అందమైన కళాకండాలుగా తీర్చిదిద్దుతున్నారు. వాటిని చెట్లకు వేలాడదీసి తన పెరటి తోటను ఆహ్లాదకరమైన ప్రదేశంగా మార్చారు. పర్యావరణ పరిరక్షణ గురించి ప్రజల్లో అవాగాహన కల్పిస్తూ శభాష్ అనిపించుకుంటున్నారు.
కొడగు జిల్లాకు చెందిన సతీశ్ పర్యావరణ పరిరక్షణ కోసం తన వంతు కృషిచేస్తున్నారు. పాఠశాలలో విద్యార్థులకు పర్యావరణం అవశ్యకతను బోధిస్తున్న సతీశ్.. చేతల్లో దానిని చేసి చూపుతున్నారు. పనికిరాని ప్లాస్టిక్ డబ్బాలను వృథాగా పోనీయకుండా వాటిని అందమైన వస్తువులుగా రూపొందిస్తున్నారు.
ఇంటి పెరడే అలంకరణ స్థానంగా..
ప్రకృతి ప్రేమికులైన సతీశ్.. ప్రభుత్వ ప్రాథమిక పాఠశాలలో పనిచేస్తూనే కొడగు జిల్లాలో పర్యావరణ పరిరక్షణ గురించి ప్రచారం చేస్తున్నారు. పట్టణంలో వాడిపారేసిన ప్లాస్టిక్ వస్తువులను రీసైకిల్ చేసి వాటిని అద్భుత కళాకండాలుగా తీర్చిదిద్దుతున్నారు. వీటికి తన ఇంటి పెరడునే అలంకరణ స్థానంగా ఎంచుకున్నారీ ఉపాధ్యాయుడు.
పారేసే వస్తువులకు సరికొత్త రూపం..
ఆయిల్ క్యాన్లు, నీటి సీసాలు, సర్ఫ్ డబ్బాలను అలంకరణ వస్తువులుగా మార్చిన సతీశ్.. మార్కెట్లో దొరికే రంగురాళ్లు, గవ్వల్ని ప్లాస్టిక్ డబ్బాలకు అమర్చి వాటికి సరికొత్త రూపు తీసుకొచ్చారు. డబ్బాలకు పెయింట్‌ వేసి వాటిని జంతువులు, మనుషుల బొమ్మలుగా మలిచిన ఆయన.. మరికొన్ని వస్తువులను చూడ ముచ్చటైన ఫ్లవర్‌వాచ్లుగా తయారుచేశారు. వాటిలో పూల మొక్కలు పెంచుతున్నారు. పూలకుండీలను ఓ పద్ధతిలో అమర్చి.. తన పెరటిని ఆహ్లాదకరంగా మార్చారు.
వీటితో పాటు చెట్లకు ప్లాస్టిక్ సీసాలను వేలాడదీసి అందులో నీళ్లు పోసి పక్షుల దాహం తీర్చుతున్నారు సతీశ్. నీళ్లు తాగేందుకు వచ్చే పక్షుల కిలకిల రాగాలతో ఆ పెరడు మార్మోగుతోంది.
ఇదీ చదవండి: ఏనుగు మృతిపై కొత్త ట్విస్ట్- ఆ వార్తలు నమ్మొద్దట
