లోక్​సభ ముందుకు మోటార్​ వాహనాల చట్ట సవరణ బిల్లు

ట్రాఫిక్ నిబంధనలను ఉల్లంఘించేవారిపై భారీ జరిమానాలు విధింపు.. మోటార్ వాహనాల ప్రమాద బాధితులకు రక్షణ కల్పించేలా మోటార్ వాహనాల చట్ట సవరణ బిల్లును లోక్‌సభలో ప్రవేశపెట్టింది కేంద్రం. ప్రమాదంలో మరణించిన వారికి రూ.5 లక్షలు, తీవ్రంగా గాయపడినవారికి రూ.2.5 లక్షలు పరిహారం అందించేలా సవరణలు ప్రతిపాదించింది. రోడ్డు ప్రమాదాల్లో మరిన్ని ప్రాణాలు పోకుండా కాపాడేందుకు ఈ బిల్లును తీసుకొచ్చినట్లు పేర్కొంది.

మోటార్ వాహనాల ప్రమాద బాధితులకు రక్షణ కల్పించేలా ప్రతిపాదించిన బిల్లును కేంద్ర ప్రభుత్వం లోక్‌సభలో ప్రవేశపెట్టింది. కేంద్ర రహదారులు, రవాణాశాఖ సహాయ మంత్రి వీకే సింగ్ సోమవారం.. లోక్‌సభ ముందుకు మోటార్ వాహనాల చట్ట సవరణ బిల్లును తీసుకొచ్చారు. వాహన ప్రమాదాల్లో ప్రాణాలు కోల్పోయిన వారికి రూ.5 లక్షలు, తీవ్రంగా గాయపడిన వారికి రూ.2.5 లక్షల పరిహారం అందజేసేలా బిల్లులో ప్రతిపాదనలు చేశారు. మోటార్ వాహనం యజమాని లేదా బీమా కంపెనీ పరిహారాన్ని అందజేసేలా ప్రతిపాదించారు.

భారీ జరిమానాలు...

ట్రాఫిక్ నిబంధనలను ఉల్లంఘించే వారిపై భారీ జరిమానాలు విధించేలా పలు సవరణలు ప్రతిపాదించారు. ఆన్‌లైన్‌లోనే లెర్నింగ్ లైసెన్స్‌ల మంజూరు, రోడ్డు ప్రమాదంలో గాయపడిన బాధితులు, వారి కుటుంబాలకు ఆసరాగా నిలిచేలా ఇన్సూరెన్స్‌ నిబంధనలు సరళీకరించాలని ప్రతిపాదించారు. ట్రాన్స్‌పోర్ట్‌ లైసెన్స్‌ రెన్యువల్ కాలపరిమితిని మూడేళ్ల నుంచి ఐదేళ్లకు పెంచనున్నారు. దివ్యాంగులకు లైసెన్స్‌లు జారీచేసేలా ప్రతిపాదనలు చేశారు. కాలపరిమితి ముగిసిన డ్రైవింగ్ లైసెన్స్‌ రెన్యువల్‌ గడువును నెల రోజుల నుంచి సంవత్సరానికి పెంచాలని ప్రతిపాదించారు.

గత లోక్​సభలోనే..

గత లోక్‌సభలోనే మోటార్ వాహనాల చట్ట సవరణ బిల్లు ఆమోదం పొందినప్పటికీ.. రాజ్యసభలో మోక్షం లభించలేదు. ఈ నేపథ్యంలో మరోసారి బిల్లును లోక్​సభలో ప్రవేశపెట్టింది కేంద్రం. రాష్ట్రాల హక్కులకు భంగం కలిగించేలా కొన్ని ప్రతిపాదనలు ఉన్నాయని విపక్షాలు అభ్యంతరం వ్యక్తం చేశాయి. విపక్షాల ప్రశ్నలకు కేంద్ర రహదారులు, రవాణాశాఖ మంత్రి నితిన్ గడ్కరీ సమాధానమిచ్చారు. రాష్ట్రాల హక్కులను కేంద్రం లాక్కోబోదన్నారు. రోడ్డు ప్రమాదాల్లో మరిన్ని ప్రాణాలు పోకుండా చూసేందుకు ఈ బిల్లుకు ఆమోదం తెలపాలని సభను కోరారు.

ఇదీ చూడండి: ఎన్​ఐఏ చట్ట సవరణ బిల్లుకు లోక్​సభ ఆమోదం