జమ్ముకశ్మీర్లో ఉగ్ర ఏరివేత కొనసాగుతోంది. ఇవాళ మరో ఇద్దరు ముష్కరులను మట్టుబెట్టింది సైన్యం. 3 రోజుల క్రితం.. బిజ్బిహారా ప్రాంతంలో ఓ సీఆర్పీఎఫ్ జవాను, మూడేళ్ల బాలుడ్ని బలిగొంది వీరేనని జమ్ముకశ్మీర్ డీజీ దిల్బాగ్ సింగ్ వెల్లడించారు.
అనంత్నాగ్ జిల్లా వాగామా వద్ద ఉగ్రవాదులున్నారన్న సమాచారంతో నిర్బంధ తనిఖీలు చేపట్టాయి భద్రతా దళాలు. ముందే పసిగట్టిన ముష్కరులు.. సైన్యంపై కాల్పులు జరిపారు. ఇది.. ఇరువర్గాల మధ్య ఎన్కౌంటర్కు దారితీసింది. బలగాల కాల్పుల్లో ఉగ్రవాదులు హతమయ్యారు. ఘటనా స్థలం నుంచి ఒక ఇన్సాస్ రైఫిల్, పిస్తోల్ను స్వాధీనం చేసుకున్నారు. గాలింపు చర్యలు కొనసాగుతున్నాయి. అనంత్నాగ్ జిల్లాలోని ఖుల్చోహార్ ప్రాంతంలో సోమవారం జరిగిన ఎదురుకాల్పుల్లో ముగ్గురు ముష్కరులను భద్రతా దళాలు మట్టుబెట్టాయి.
కాల్పుల విరమణ..
ఇదే సమయంలో జమ్ముకశ్మీర్లోని నౌగామ్ సెక్టార్ వద్ద.. పాక్ సైన్యం కాల్పుల విరమణ ఉల్లంఘించింది. భారత సైనిక శిబిరాలే లక్ష్యంగా.. మోర్టార్లను ప్రయోగించింది. పాక్ దుశ్చర్యను భారత సైన్యం దీటుగా తిప్పికొడుతోంది.
