దేశంలో కరోనా వైరస్ విజృంభిస్తున్న నేపథ్యంలో ఈసారి స్వతంత్ర వేడుకలు ఏ విధంగా ఉంటాయనే అంశంపై సర్వత్రా ఆసక్తి నెలకొంది. కరోనాను దృష్టిలో పెట్టుకుని అధికారులు ఇప్పటికే ప్రణాళికలు మొదలుపెట్టినట్టు తెలుస్తోంది. ఎన్నడూ లేని విధంగా ఈ ఏడాది దేశ రాజధాని దిల్లీలోని ఎర్రకోట వేడుకల్లో భారీ మార్పులు జరగనున్నట్టు సమాచారం.
మార్పులు ఇలా!
- వీవీఐపీలు, ఇతర ఔత్సాహికుల్లో కేవలం 20మందికే అనుమతి.
- చిన్నారులకు, ఎన్సీసీ సభ్యులకు అనుమతి లేదు.
- ప్రధాని ప్రసంగించే వేదిక సమీపంలో వీవీఐపీలు కూర్చునేందుకు వీలు లేదు. కొంచెం దిగువన కూర్చోవాలి. అది కూడా ఒకప్పటిలా 900మంది కాకుండా.. 100మందికి మాత్రమే అనుమతి.
వీటితో పాటు కరోనాను జయించిన 1500మందిని ఈ వేడుకలకు ఆహ్వానించనున్నట్టు సమాచారం. ఇందులో 1,000మంది దేశంలోని వివిధ ప్రాంతాలకు చెందిన వారు కాగా.. 500మంది స్థానిక పోలీసులు ఉండే అవకాశముంది.
స్వాతంత్ర్య దినోత్సవానికి మరో నెలరోజుల సమయమే ఉన్నందున.. ఏర్పాట్లు మొదలుపెట్టారు. రక్షణశాఖ కార్యదర్శి అజయ్ కుమార్ సహా ఇతర అధికారులు గత వారం ఎర్రకోటను సందర్శించారు. భౌతిక దూరాన్ని పాటిస్తూనే ఏర్పాట్లు చేయాలని సంబంధిత అధికారులకు సూచించారు.
ప్రధాని ప్రసంగాన్ని వినేందుకు.. గతేడాది వరకు దాదాపు 10వేల మంది ఎర్రకోటకు తరలివెళ్లేవారు.
ఇదీ చూడండి:- కరోనా టాప్గేర్తో ఆ రాష్ట్రాల్లో మళ్లీ లాక్డౌన్
