భారత్లో కొవిడ్ కేసులు భారీగానే నమోదవుతున్నాయి. అయితే దీనికి తగిన విధంగా వైరస్ నుంచి కోలుకుంటున్న వారి సంఖ్య కూడా పెరుగుతోంది. మరణాల రేటు స్థిరంగా క్షీణిస్తోంది. వైరస్ రికవరీ రేటు 68.32 శాతానికి పెరగగా... మరణాల రేటు 2.04కు తగ్గిందని కేంద్ర ఆరోగ్యశాఖ వివరించింది.
కేంద్ర, రాష్ట్ర ప్రభుత్వాలు కొవిడ్ నివారణకు తీసుకున్న సమర్థమైన చర్యలే దీనికి కారణమని తెలుస్తోంది. టెస్టింగ్, ట్రాకింగ్, ట్రీట్ వ్యూహంతో బాధితులను గుర్తించి.. సకాలంలో చికిత్స అందిస్తున్నారు వైద్యులు. ఫలితంగా మరణాల రేటు తగ్గుతోందని మంత్రిత్వ శాఖ తెలిపింది.
ఆరోగ్య శాఖ తెలిపిన కీలక అంశాలు
- దేశంలో ప్రతి 10 లక్షల జనాభాకు సగటున 1,469 మందికి వైరస్ పాజిటివ్గా తేలుతున్నారు. ఇది ప్రపంచ సగటు 2,425 కంటే తక్కువ.
- మరణాల రేటు స్థిరంగా క్షీణిస్తోంది. ప్రపంచంలో సగటున 10 లక్షల జనాభాలో 91 మంది మృతి చెందగా.. దేశంలో 30 మరణాలు సంభవిస్తున్నాయి.
- ఇప్పటివరకు 14,27,005 మంది వైరస్ను జయించారు. ఫలితంగా రికవరీ రేటు 68.32 పెరిగింది.
- 6,19,088 మంది ఆసుపత్రుల్లో బాధితులు చికిత్స పొందుతున్నారు. ఈ సంఖ్య... మొత్తం కేసుల్లో 29.64 శాతంగా ఉంది.
- రోజుకు దాదాపు 6 లక్షల మందికి కరోనా పరీక్షలు నిర్వహిస్తున్నాం. దీంతో మొత్తం 2 కోట్లు 33 లక్షల మందికి పైగా పరీక్షించాం.
- మిలియన్ జనాభాలో కొవిడ్ నిర్ధరణ పరీక్షల సగటు 16,947కు పెరిగింది.
- కరోనా నిర్ధరణ ల్యాబ్ల సంఖ్య పెంచడం కరోనా నివారణలో కీలక అంశం.
ఇదీ చూడండి: దిల్లీలో మళ్లీ పెరుగుతున్న కరోనా కేసులు
