కరోనా వైరస్ దేశంలో వేగంగా విస్తరిస్తోన్న వేళ కేంద్ర రాష్ట్ర ప్రభుత్వాలు హెల్ప్లైన్లు ఏర్పాటు చేశాయి. కానీ ఈ హెల్ప్లైన్ సెంటర్కు ఫోన్ చేసినప్పడు కాల్ కనెక్ట్ కాక అవస్థలు పడ్డుతున్నారు ప్రజలు.
తాజాగా దిల్లీకి చెందిన తివారీ అనే వ్యక్తి కరోనా లక్షణాలతో బాధపడుతూ పరీక్ష చేయించుకోవాలో? లేదో ? తెలుసుకోవటానికి హెల్ప్లైన్కు ఫోన్ చేశాడు. కానీ కాల్ కనెక్ట్ కాక చివరకు స్థానిక వైద్యుడి వద్ద చికిత్స చేయించుకున్నట్లు తెలిపాడు.
"ప్రభుత్వం అందుబాటులో ఉంచిన హెల్ప్లైన్ నెంబర్లు బిజీ వచ్చాయి. ఒక్కొక్క సారి కనెక్ట్ కూడా కాలేదు. దాదాపు అర గంట సేపు వేచి చూశాను. కానీ అసలు కనెక్ట్ కాలేదు. చివరకు నేను స్థానిక వైద్యుడి వద్దకు వెళ్లాను. కరోనా వైరస్ సోకలేదని ఆయన ధైర్యం చెప్పారు."
-తివారీ, బాధితుడు
మరో ఘటన...
దిల్లీలో ఓ మీడియా సంస్థలో పని చేస్తున్న చింకి సిన్హాకు కూడా ఇదే తరహా అనుభవం ఎదురైంది. తన పక్క కాలనీలోని ఓ వ్యక్తికి కరోనా లక్షణాలు ఉన్నాయని అధికారులకు తెలియజేయటానికి హెల్ప్లైన్కు ఫోన్ చేయగా అరగంట సేపు బిజీ వచ్చింది.
"మా పక్క వీధిలోని కరోనా పాజిటివ్ కేసు గురించి, కొంత మంది వ్యక్తులు మాస్క్లు లేకుండా తిరుగుతున్న విషయం గురించి అధికారులకు తెలియజేయాలని భావించాను. మా ప్రాంతాన్ని శానిటైజ్ చేయాలని కోరాలనుకున్నాను. హెల్ప్లైన్కు ఫోన్ చేసినప్పుడు అరగంట సేపు బిజీ వచ్చింది. చివరకు దిల్లీ ముఖ్యమంత్రి అరవింద్ కేజ్రీవాల్కు మా సమస్య గురించి ట్వీట్ చేశారు. కానీ ఇంత వరకు ఎలాంటి స్పందన రాలేదు."
-చింకి సిన్హా, జర్నలిస్టు.
దిల్లీ నుంచి మరో వ్యక్తి కూడా తనకు తెలిసిన రెండు కరోనా పాజిటివ్ కేసుల గురించి అధికారులకు తెలపటానికి ప్రభుత్వం ఏర్పాటు చేసిన హెల్ప్లైన్లకు ఫోన్ చేయగా కాల్ కలవలేదని తెలిపారు.
ఇతర రాష్ట్రాల్లోనూ...
ఇలాంటి ఘటనలు మహారాష్ట్ర, ఉత్తరప్రదేశ్, హరియాణా రాష్ట్రాల్లోనూ జరిగాయి. హెల్ప్లైన్ కాల్స్పై ఫిర్యాదులు పెరిగిపోతున్న నేపథ్యంలో సమస్య అధిగమించడంపై ఆయా రాష్ట్ర ప్రభుత్వాలు దృష్టి సారించాయి.
