రాజస్థాన్లో గత వారం జరిగిన పట్టణ స్థానిక సంస్థల ఎన్నికల్లో అధికార కాంగ్రెస్ 961 వార్డుల్లో విజయం సాధించింది. భాజపా 737 స్థానాలతో సరిపెట్టుకుంది. మంగళవారం ప్రకటించిన ఫలితాల్లో... కాంగ్రెస్ ప్రధాన ప్రత్యర్థి భాజపాపై 49 పురపాలికల్లోనూ ఆధిపత్యం ప్రదర్శించింది.
ఆశించిన విధంగానే...
2018 డిసెంబర్లో రాజస్థాన్లో కాంగ్రెస్ అధికారంలోకి వచ్చింది. ఆ తరువాత తొలిసారి జరిగిన ఎన్నికల్లో కాంగ్రెస్ దాదాపు సగం వార్డుల్లో గెలుచుకుంది. అయితే ఎన్నికల ఫలితాలు ఇంకా వెలువడకముందే... ఫలితాలు ఆశించిన విధంగానే వచ్చాయని ముఖ్యమంత్రి అశోక్ గెహ్లోత్ పేర్కొనడం విశేషం.
'ప్రభుత్వ పనితీరును పరిగణనలోకి తీసుకున్న ప్రజలు.. పార్టీకి పట్టంకట్టడం చాలా సంతోషకరమైన విషయం." - అశోక్ గెహ్లోత్, రాజస్థాన్ ముఖ్యమంత్రి
కాంగ్రెస్ ఘన విజయం..
రాజస్థాన్లోని 33 జిల్లాలు ఉన్నాయి. వీటిలో 24 జిల్లాల్లోని 49 పట్టణ స్థానిక సంస్థలకు శనివారం ఎన్నికలు జరిగాయి. వీటిలో 3 మున్సిపల్ కార్పొరేషన్లు, 18 నగర పరిషత్లు, 28 నగర పాలికలు ఉన్నాయి. మొత్తంగా 71.53 శాతం మంది తమ ఓటు హక్కును వినియోగించుకున్నారు.
రాష్ట్ర ఎన్నికల సంఘం ప్రకారం.. పట్టణ స్థానిక సంస్థల ఎన్నికల్లో బహుజన్ సమాజ్ పార్టీ 16, సీపీఎం 3, నేషనలిస్ట్ కాంగ్రెస్ 2 స్థానాల్లో విజయం సాధించాయి.
వచ్చే మంగళవారం స్థానిక సంస్థల ఛైర్మన్, డిప్యూటీ ఛైర్మన్ పదవులకు ఎన్నికలు జరుగుతాయి.
ఇదీ చూడండి: దీదీ X ఓవైసీ: 'మైనార్టీ తీవ్రవాదం'పై మాటల తూటాలు
