సార్వత్రిక ఎన్నికల్లో పార్టీ పరాభవంపై చర్చించేందుకు కాంగ్రెస్ వర్కింగ్ కమిటీ దిల్లీలో భేటీ అయింది. ఓటమికి కారణాలు విశ్లేషించి.. తదుపరి కార్యచరణపై దృష్టి పెట్టేందుకు సమావేశం ఏర్పాటుచేసింది. పరాజయంతో కుంగిపోకుండా.. శ్రేణుల్లో స్థైర్యం నింపే ప్రయత్నం చేశారు నేతలు. పార్టీని బలోపేతం చేసే దిశగా ముందుకెళ్లాలని నిర్ణయించారు.
కాంగ్రెస్ అధ్యక్షుడు రాహుల్ గాంధీ సమావేశానికి నేతృత్వం వహించారు. యూపీఏ ఛైర్పర్సన్ సోనియా గాంధీ, మాజీ ప్రధాని మన్మోహన్ సింగ్ సహా పార్టీ ప్రధాన కార్యదర్శి ప్రియాంక గాంధీ, కాంగ్రెస్ పాలిత ప్రాంతాలైన పంజాబ్, రాజస్థాన్, ఛత్తీస్గఢ్, పుదుచ్చేరి ముఖ్యమంత్రులు, ఇతర సీనియర్ నేతలు హాజరయ్యారు.
ముఖ్యంగా లోక్సభ ఎన్నికల్లో పార్టీ ఓటమికి ప్రధాన కారణాలను విశ్లేషించారు. ప్రజలకు ఎందుకు చేరువకాలేదనే అంశంపై కమిటీ సుదీర్ఘంగా చర్చించింది. కాంగ్రెస్ ఓటమిపై నేతలు తమ తమ అభిప్రాయాలు వెల్లడించారు.
రాహుల్ రాజీనామా వార్త అవాస్తవం...?
కాంగ్రెస్ అధ్యక్ష పదవికి.. రాహుల్ గాంధీ రాజీనామా చేస్తున్నారని వచ్చిన వార్తలను ఖండించారు పార్టీ అధికార ప్రతినిధి రణ్దీప్ సుర్జేవాలా. సీడబ్ల్యూసీ భేటీ సమయంలోనే రాహుల్ గాంధీ రాజీనామా ప్రతిపాదన చేశారని.. కమిటీ ఇందుకు ఆమోదం తెలపలేదన్నట్లు వార్తలొచ్చాయి. ఈ ఊహాగానాలు అవాస్తవమని స్పష్టం చేశారు సుర్జేవాలా.
ఇటీవలి ముగిసిన సార్వత్రిక ఎన్నికల్లో కాంగ్రెస్ పార్టీ ఘోర పరాజయం పాలైంది. 2014లో 44 స్థానాలు గెల్చుకున్న హస్తం పార్టీ.. ఈ సారి 52 చోట్ల నెగ్గింది. యూపీఏ మొత్తంగా 82 స్థానాలు దక్కించుకుంది.
కొన్ని రాష్ట్రాల్లో కాంగ్రెస్ ఓటమికి నైతిక బాధ్యత వహిస్తూ పార్టీ బాధ్యులు కొందరు ఇప్పటికే రాజీనామా సమర్పించారు. ఇందులో యూపీ కాంగ్రెస్ చీఫ్ రాజ్బబ్బర్, ఒడిశా కాంగ్రెస్ అధ్యక్షుడు నిరంజన్ పట్నాయక్ ఉన్నారు.
ఇదీ చూడండి:
