ఛత్తీస్గఢ్ దంతెవాడ జిల్లాలోని రెండు ప్రాంతాల్లో 27 మంది మావోయిస్టులు లొంగిపోయారు. వీరిలో రూ.లక్ష నగదు రివార్డు ఉన్న నలుగురు నక్సల్స్ ఉన్నారని ఓ సీనియర్ అధికారి తెలిపారు. పోలీసులు ఏర్పాటు చేసిన పునరావాస చర్యలు వారిని ప్రభావితం చేసినట్లు ఆయన వెల్లడించారు.
కౌకొండ పోలీస్ స్టేషన్లో సీనియర్ అధికారుల ఎదుట నలుగురు మహిళా మావోయిస్టులతో సహా 25 మంది లొంగిపోయారు. ప్రకాశ్ కర్తామీ (పండు), హద్మీ అనే మరో మావోయిస్టు జంట దంతెవాడ ఎస్పీ అభిషేక్ పల్లవ ఎదుట సరెండర్ అయ్యారు.
ప్రస్తుతం లొంగిపోయిన నక్సల్స్ చాలా ఆపరేషన్లలో పాల్గొన్నట్లు అధికారి తెలిపారు. 2016 మార్చిలో ఏడుగురు సీఆర్పీఎఫ్ జవాన్లు చనిపోయన మెయిల్వాడా మందుపాతర దాడితో వీరికి సంబంధం ఉందని వివరించారు.
విసిగిపోయామంటూ..
'డొల్ల మావోయిస్టు భావజాలం'తో విసిగిపోయినట్లు లొంగిపోయే సమయంలో నక్సల్స్ వాంగ్మూలం ఇచ్చారు. గ్రామాలకు తిరిగి వచ్చేలా పోలీసులు చేస్తోన్న ప్రయత్నాలు నచ్చి ఈ నిర్ణయం తీసుకున్నట్లు వెల్లడించారు. వీరందరికీ తక్షణ సాయంగా రూ.10 వేలు అందించింది ప్రభుత్వం. ప్రభుత్వ పునరావాస పథకం కింద అన్ని సౌకర్యాలను త్వరలోనే కల్పిస్తామని అధికారులు తెలిపారు.
53 మంది...
నక్సల్స్ ప్రభావం అధికంగా ఉండే ఛత్తీస్గఢ్లో 'గ్రామాలకు తిరిగి రండి' అనే ప్రత్యేక కార్యక్రమాన్ని ప్రారంభించింది పోలీస్ విభాగం. జనజీవన స్రవంతిలో కలవాలని పోస్టర్ల ద్వారా నక్సల్స్కు విజ్ఞప్తి చేస్తున్నారు. ఇప్పటివరకు ఇలా 53 మంది మావోయిస్టులు లొంగిపోయారు.
ఇదీ చూడండి: ఉత్తర్ప్రదేశ్ గ్యాంగ్స్టర్ వికాస్ దూబే అరెస్ట్
