ఉత్తర్ప్రదేశ్ భాజపా ఎమ్మెల్యే రాజేశ్ మిశ్రా కూతురు సాక్షి దంపతులకు ప్రత్యేక రక్షణ కల్పించాలని పోలీసులను ఆదేశించింది అలహాబాద్ హైకోర్టు. వేరే కులానికి చెందిన వ్యక్తిని పెళ్లి చేసుకున్నందుకు తన తండ్రి నుంచి ముప్పు ఉందని సాక్షి.. ఇటీవల కోర్టులో పిటిషన్ దాఖలు చేసింది. నేడు న్యాయస్థానం ఎదుట హాజరైన సాక్షి, ఆమె భర్త అజితేశ్ కుమార్లకు రక్షణ కల్పించాలని నిర్ణయం వెలువరించింది కోర్టు.
కోర్టు తీర్పు వెలువరించిన కాసేపటికే... వారు బయటకు వస్తున్న సమయంలో గుర్తు తెలియని వ్యక్తులు సాక్షి భర్తపై దాడి చేశారు. వారికి ప్రాణహాని ఉందని.. అందుకే రక్షణ కల్పించాలని కోర్టుకు విన్నవించినట్లు పిటిషనర్ తరఫు న్యాయవాది పేర్కొన్నారు.
పోలీసులు, ఎమ్మెల్యే రాజేశ్ మిశ్రా.. తమకు ఎలాంటి ఇబ్బందులు సృష్టించకుండా ప్రశాంతమైన జీవితం గడిపేలా చూడాలని అభ్యర్థించారా దంపతులు.
ఇదీ జరిగింది...
ఉత్తర్ప్రదేశ్కు చెందిన భాజపా ఎమ్మెల్యే రాజేశ్ మిశ్రా కూతురు సాక్షి. బ్రాహ్మిణ్ అయిన ఆమె.. నిమ్న వర్గానికి చెందిన అజితేశ్ను ప్రేమవివాహం చేసుకుంది. ఇది తన తండ్రికి ఇష్టం లేదని... ఆయనతో తమ ప్రాణాలకు ముప్పుందని కోర్టును ఆశ్రయించారు. వీరి అభ్యర్థనను స్వీకరించిన న్యాయస్థానం.. రక్షణ కల్పించాలని ఆదేశించింది.
