తమిళనాడు కాంచీపురంలోని వరదరాజ పెరుమాళ్ ఆలయంలో 'అత్తివరదరాజ స్వామి వైభవం' అట్టహాసంగా ముగిసింది. సుమారు కోటి మంది భక్తులు స్వామి వారిని దర్శించుకున్నారు. 40 ఏళ్ల అనంతరం భక్తులకు దర్శనమిచ్చిన స్వామి విగ్రహం 48 రోజుల అనంతరం తిరిగి కోనేరుకు చేరుకుంది.
స్వామివారిని కోనేరుకు తీసుకెళ్లే సందర్భంగా అర్చకులు ప్రత్యేక పూజలు నిర్వహించారు. విగ్రహం దెబ్బతినకుండా ఉండటానికి ప్రత్యేక మూలికలతో చుట్టారు. శనివారం అర్ధరాత్రి 12 గంటలకు విగ్రహాన్ని కోనేరులో పెట్టి నీరు నింపారు.
ఇదీ ప్రత్యేకత...
వరదరాజ పెరుమాళ్ ఆలయానికి ఓ ప్రత్యేకత ఉంది. అత్తివరదరాజ స్వామి.. ఆలయంలోని అనంత సరోవరం కోనేరులో విశ్రాంతి తీసుకుంటూ.. 40 ఏళ్లకు ఒక్కసారి మాత్రమే భక్తులకు దర్శనమిస్తాడు. జులై 1న స్వామి దర్శనం ప్రారంభమైంది. 48 రోజులపాటు నిత్యం ఆలయానికి భక్తులు పోటెత్తారు.
