పూదోటకు లైటేస్కో! ఇంజనీర్​ రైతుకు ఓ లైకేస్కో!

ఓ ఇంజనీర్​ రైతుగా మారాడు. వ్యవసాయానికి సాంకేతికతను జోడించాడు. లైట్ల వెలుగులో  పూలు సాగు  చేసి లక్షల ఆదాయం పొందుతున్నాడు. సాటి యువకులకు ఆదర్శంగా నిలుస్తున్నాడు.

కర్ణాటక చామరాజ్​నగర్​లోని సతీష్​ అనే ఓ ఇంజనీర్​ దృష్టి వ్యవసాయం వైపు మళ్లింది. గుడ్డిగా మట్టిని నమ్ముకున్నవారికే నేలమ్మ కావాల్సినంత దిగుబడినిస్తుంది. మరి ఈ ఇంజనీర్​ వెలుతురులో వ్యవసాయం చేస్తున్నాడు. అందుకే భూదేవి మురిసి పూల కాసులు కురిపిస్తోంది. చామంతి పూల సాగుతో లాభాలు ఆర్జిస్తున్నాడు సతీష్.

వెలుతురులో వికసించే కుసుమాలు

ఈ జాతి చామంతి పూలు చైనాలో ఎక్కువగా పూస్తాయి. భారతదేశంలో కోల్​కతాలో మాత్రమే కనిపిస్తాయి. చూడచక్కని వర్ణాలతో వేడుక ఏదైనా అలంకరణకు ఈ పూలు చక్కటి ఆభరణంగా అబ్బుతాయి. ఒక్క పూజాతిలోనే తీరొక్క పూలు ఇమిడి ఉన్నాయి. ప్రస్తుతం ఈ పూలలో ఇక్కడ 8 రకాలు దొరుకుతాయి. 12 విభిన్న రంగులున్నాయి. ఒక్కో పువ్వు ధర 3/- రూపాయల నుంచి 10/- రూపాయల వరకు ఉంటుంది.

అయితే ఈ పంటకు 24 గంటల విద్యుత్తు కావాలి. వెలుతురు బాగా ఉంటేనే దిగుబడి బాగుంటుంది. రాత్రుళ్లు విద్యుత్ దీపాల వెలుతురులతో ఆ పూల కాంతులు పోటీపడి మరీ వికసిస్తాయి. ఇలా సతీశ్​కు ఎక్కువ మొత్తంలో ఆదాయం చేకూరుస్తాయి.

విద్యుత్తుతో పంట సాగు గురించి తెలుసుకుని, ఆచరిస్తూ లాభాలు ఆర్జిస్తున్నాడు ఈ ఇంజనీర్​ రైతు.

" నా కుమారుడు బీటెక్​ పూర్తి చేశాడు. యూపీఎస్​సీ పరీక్షలోనూ అర్హత సాధించాడు. కానీ, కొత్తగా ఏదైనా చేయాలని ఇలా పూల సాగు ప్రారంభించాడు. కొందరు ఉద్యోగం లేదని నిరాశ చెందుతారు. కానీ ఆలోచిస్తే చేయలేని పనంటూ లేదని నా కుమారుడు నిరూపించాడు. ఈ పూదోటకు ప్రభుత్వం ప్రోత్సాహాన్నందిస్తే బాగుంటుంది."
-సతీశ్​ తండ్రి

పుష్పాలతో లక్షల్లో ఆదాయం

సతీష్​ చైనీస్​ వ్యవసాయాన్ని భారతదేశంలో ప్రయోగించి విజయవంతమయ్యాడు. తనకున్న ఒక ఎకరం పొలాన్ని ఆద్భుతంగా సాగు చేస్తున్నాడు.

"మైసూర్​లో ఇలాంటి పూదోటను తొలిసారిగా మేమే సాగు చేస్తున్నాం. ఈ పంట సాగుకు లైట్లు, కూలీలు అన్నీ కలిపి ఏడాదికి దాదాపు 6 లక్షల రూపాయల ఖర్చు వస్తుంది. ఆదాయం సుమారు 15 లక్షల నుంచి 18 లక్షల మధ్య ఉంటుంది. సీజన్​, డిమాండ్​ను బట్టి ఆదాయం వస్తుంది. కాబట్టి యువకులు వ్యవసాయాన్ని ఇష్టంగా మార్చుకుని కష్టపడాలి."
- సతీశ్

ఇదీ చూడండి:ఫేస్​బుక్ ప్రేమ:​ ఒక్కటైన జపాన్ వధువు, తమిళ వరుడు