జమ్ముకశ్మీర్లో అలజడులకు కారణమవుతున్న వేర్పాటువాద సంస్థ 'ఆల్ పార్టీ హురియత్ కాన్ఫరెన్స్'ను నిషేధించడానికి కేంద్ర ప్రభుత్వం సమాయత్తమైంది. ఉగ్రవాద సంస్థ 'జమాతే ఇస్లామీ హింద్'ను ఇప్పటికే నిషేధించిన కేంద్ర ప్రభుత్వం, ఇప్పుడు 'హురియత్'పై దృష్టి పెట్టింది. నిఘా సంస్థలు ఇందుకు సంబంధించిన నివేదికలను హోంమంత్రిత్వశాఖకు అందజేశాయి.
''తీవ్రవాద వ్యతిరేక పోరాటం కీలక దశలోకి వచ్చింది. 'హురియత్ కాన్ఫరెన్స్' ఉగ్రవాదానికి మద్దతుగా, వేర్పాటువాద ధోరణులు ప్రదర్శిస్తోంది. అందుకే దేశ ద్రోహానికి పాల్పడుతున్న ఈ సంస్థను నిషేధించడంపై దృష్టి సారించామని'' తెలిపారు హోంమంత్రిత్వశాఖకు చెందిన అత్యున్నతాధికారి.
"'హురియత్ కాన్ఫరెన్స్' సిద్ధాంతాల వెనుక పాకిస్థాన్ ప్రేరేపిత 'జమాతే ఇస్లామీ హింద్' ఉగ్రవాద సంస్థ హస్తం ఉంది. ఈ సంస్థ జమ్ముకశ్మీర్లో వేర్పాటువాద ధోరణులను ప్రేరేపిస్తోంది."
-ఓ అధికారిక పత్రం ప్రకటన
దేశ విద్రోహ చర్యలకు పాల్పడుతూ, జమ్ముకశ్మీర్లో అశాంతి, వేర్పాటువాద ధోరణులు చెలరేగడానికి జమాతే ఇస్లామీ కారణమవుతోంది. అందుకే 'చట్టవిరుద్ధ చర్యల నివారణ చట్టం' (యూఏపీఏ) సెక్షన్ 3 ప్రకారం 'జమాతే ఇస్లామీ హింద్' సంస్థపై తాజాగా 5 సంవత్సరాల నిషేధం విధించింది కేంద్ర హోంమంత్రిత్వశాఖ.
