ఆసుపత్రిలో ఉన్న తన తల్లిచుట్టూ తిరుగుతూ ఆటలాడింది ఆ చిన్నారి. తల్లి కళ్లు మూసి ఉండేసరికి... ఆటపట్టిస్తుందేమో అనుకుని కళ్లు తెరవమని ముద్దు మాటలాడింది. శాశ్వతనిద్రలోకి జారుకున్న ఆ తల్లిని లేపేందుకు చేసిన ఆ చిన్నారి ప్రయత్నాలు విఫలమవడం.. ఆసుపత్రి సిబ్బంది, మిగతా రోగులు, వారి సహాయకులకు కంటనీరు తెప్పించింది. గుజరాత్లోని భరూచ్లో జరిగిందీ ఘటన.
భరూచ్లోని దాండియా బజార్ ప్రాంతానికి చెందిన మహిళ అనారోగ్యం కారణంగా ప్రభుత్వ ఆసుపత్రిలో చేరింది. తల్లితో పాటు ఆసుపత్రికి వెళ్లింది మూడేళ్ల చిన్నారి ప్రిన్సీ. చిన్నారి తండ్రి గతంలోనే చనిపోయాడు. ఆసుపత్రిలో చికిత్స పొందుతూ ఈ రోజు తల్లి అసువులు బాసింది. ఆదుకోవాల్సిన బంధువులు మొహం చాటేశారు. ఈ నేపథ్యంలో అనాథగా మారింది చిన్నారి ప్రిన్సీ. అయితే తల్లి చనిపోయిందని అర్థంకాక ఉత్సాహంగా మెదులుతోంది.
చిన్నారి ప్రిన్సీని అనాథ శరణాలయంలో ఉంచేందుకు ఏర్పాటు చేస్తానని ఓ సామాజిక కార్యకర్త ముందుకొచ్చాడు. అయితే పిల్లలు లేనివారు చిన్నారిని దత్తత తీసుకోవాలని పలువురు అభిప్రాయపడుతున్నారు.
ఇదీ చూడండి: ట్రంప్కు దిల్లీలో ప్రత్యేక విందు- మెనూ చాలా స్పెషల్
