దిల్లీ మెట్రో స్టేషన్లలో వరుస ఆత్మహత్యలు కలకలం రేపుతున్నాయి. తాజాగా మరో యువతి మెట్రో రైలు కింద పడి ఆత్మహత్య చేసుకుంది.
శనివారం సాయంత్రం మోడల్టౌన్ మెట్రో స్టేషన్లో పహాడ్ గంజ్కు చెందిన 25 ఏళ్ల సోనాక్షి గార్గ్ ప్లాట్ఫాంపైకి వచ్చి కాసేపు అటూ ఇటూ తిరిగింది. మెట్రో రైలు వచ్చి ప్రయాణికులను ఎక్కించుకుని కదలగానే ఆమె పట్టాలపైకి దూకేసింది. డ్రైవర్ ఎమర్జెన్సీ బ్రేక్ వేసి ఆమెను కాపాడే ప్రయత్నం చేశాడు. కానీ, అప్పటికే వేగం పుంజుకున్న రైలు... అదుపులోకి రాలేదు. ఆమె అక్కడిక్కడే ప్రాణాలు విడిచింది.
సోనాక్షి ఆత్మహత్యతో ఆ మార్గంలో 15 నిమిషాలు మెట్రో సేవలు స్తంభించాయి. వందలాది మంది ప్రయాణికులకు ఇబ్బంది పడ్డారు.
మృతదేహాన్ని బాబు జగ్జీవన్ రాం ఆసుపత్రికి చేర్చారు పోలీసులు. ఆమె వద్ద తన చావుకు ఎవరూ బాధ్యులు కాదని రాసున్న ఓ ఉత్తరం దొరికింది.
"గత కొన్ని రోజులుగా ఆమె అనారోగ్యంతో బాధపడుతోంది. ఈ కారణంగానే ఆమె తీవ్ర ఆవేదనకు లోనైంది. అందుకే ఈ నిర్ణయం తీసుకుని ఉంటుంది" అని కుటుంబ సభ్యులు చెప్పారు. ఆజాద్పుర్ పోలీసులు కేసు నమోదు చేసుకుని దర్యాప్తు జరుపుతున్నారు.
వారం రోజుల క్రితమే జండేవాలా మెట్రో స్టేషన్లో ఇలాగే ఓ మహిళ ఆత్మహత్య చేసుకుంది.
ఇదీ చూడండి:'వాళ్లు ఉగ్రవాదులు కాదు.. మా దేశ రైతులు'
