కరోనా మహమ్మారి భారత్లో తల్లిదండ్రులను ఆందోళనకు గురిచేస్తోంది. లాక్డౌన్ కారణంగా విద్యాసంవత్సరమంతా ఇంట్లోనే గడిచింది. అందుకే ఈ కరోనా కాలంలో 85 శాతం మంది తల్లిదండ్రుల్లో పిల్లల భవిష్యత్తు గురించి చింత పెరిగిందని ఓ సర్వే వెల్లడించింది.
నర్సరీ నుంచి ఇంటర్ వరకు విద్యార్ధుల తల్లిదండ్రులపై ఓ సర్వే చేపట్టింది లీడ్ స్కూల్. 5 వేల మంది పాల్గొన్న ఈ సర్వేలో 70 శాతం మంది వారి పిల్లల విద్యాభ్యాసం గురించి చింతిస్తున్నారు. 78 శాతం మంది వారి పిల్లల ఆరోగ్యం గురించి, 40 శాతం మంది ఓ విద్యా సంవత్సరం కోల్పోతున్నారని బాధపడుతున్నారు.
"తల్లిదండ్రులు ఈ సమయంలోనే ఆచితూచి పాఠశాలలను ఎంపిక చేసుకోవాలి. తల్లిదండ్రులు పాఠశాలలను నమ్మి కలిసి ముందడుగు వేయాలి."
-సుమీత్ మెహ్రా, లీడ్ స్కూల్ సీఈఓ
70 శాతం మంది తల్లిదండ్రులు ఇంట్లోనే తమ పిల్లలకు చదువు నేర్పిస్తున్నట్లు ఈ సర్వేలో తేలింది. మరో 60 శాతం మంది ఆన్లైన్ క్లాసులను నమ్ముకున్నారు. 79 శాతం మంది తల్లిదండ్రులు తమ పిల్లలతో సరిగ్గా సమయమే గడపట్లేదు.
సర్వే ప్రకారం మహారాష్ట్ర, మధ్యప్రదేశ్, రాజస్థాన్, హరియాణాలలోని తల్లిదండ్రులు తమ పిల్లలకు నేర్పించే నైపుణ్యం తమకు లేదని భావిస్తున్నారు. ఇక దక్షిణ భారతంలోని కర్ణాటక, కేరళ, తమిళనాడు, తెలంగాణలలో తల్లిదండ్రులు తమ పిల్లలను లాక్డౌన్లోనూ చదివించగలుగుతున్నామని విశ్వసిస్తున్నారు.
