స్మార్ట్ఫోన్ ఉన్న వారిలో పబ్జీ( ప్లేయర్ అన్నౌన్స్ బ్యాటిల్ గ్రౌండ్)అంటే తెలియని వారుండరు. ఇటీవల ఈ ఆట వల్ల ఆత్మహత్య చేసుకున్న ఘటనలు చూశాం. ముంబయిలో 11 ఏళ్ల కుర్రాడు పబ్జీని నిషేధించాలని కోర్టును ఆశ్రయించాడంటే ఈ ఆట ఎంత ప్రమాదకరమో అర్థం చేసుకోవచ్చు.
ఆన్లైన్ ఆటలైన పబ్జీ, మోమో ఛాలెంజ్లపై గుజరాత్ రాజ్కోట్ పోలీసులు ఉక్కుపాదం మోపారు. నగరంలో పబ్జీని నిషేధిస్తూ పోలీస్ కమిషనర్ మనోజ్ అగర్వాల్ ఈనెల 6న ఉత్తర్వులు జారీ చేశారు. ఇకపై ఎవరైనా పబ్జీ ఆడుతూ కనిపిస్తే అరెస్ట్ చేయాలని నగరవ్యాప్తంగా ఉన్న పోలీస్స్టేషన్లకు ఆదేశాలిచ్చారు. పిల్లలు, యువతలో హింసాత్మక ప్రవర్తన పెరుగుతోందన్న కారణంతో నిషేధం విధిస్తున్నట్లు ఉత్తర్వుల్లో పేర్కొన్నారు.
నిషేధం అమలులోకి వచ్చినప్పటికీ ఇంకా కొందరిలో మార్పు రాలేదు. రెండు రోజుల్లోనే పబ్జీ ఆడుతున్న 10 మందిని అరెస్ట్ చేశారు పోలీసులు. మంగళవారం ఒక్కరోజే కలవడ్ రోడ్, జగన్నాథ్ చౌక్ ప్రాంతంలో పబ్జీ ఆడుతున్న ఆరుగురు కళాశాల విద్యార్థులు, ఓ ప్రైవేటు ఉద్యోగిని అరెస్ట్ చేశారు. మరుసటి రోజున రాజ్కోట్ పోలీసుల ప్రత్యేక ఆపరేషన్లో ముగ్గురు పట్టుబడ్డారు.
బెయిల్పై విడుదల
అరెస్టైన పది మందిపై ఐపీసీ సెక్షన్ 188 కింద కేసులు నమోదు చేసినట్లు పోలీసులు తెలిపారు. అనంతరం వారిని బెయిల్పై విడుదల చేశామని తెలిపారు.
అహ్మదాబాద్ పోలీస్ కమిషనర్ సైతంపబ్జీపై నిషేధం విధిస్తూ నోటిఫికేషన్ విడుదల చేశారు.
