RRB Exam Scam Protests: ఆర్ఆర్బీ పరీక్షల్లో 'అక్రమాల'పై బిహార్లో జరుగుతున్న నిరసనలు మూడో రోజు హింసాత్మకంగా మారాయి. గయాలో రైలు పట్టాలపై ఆందోళనలు చేపట్టిన ఉద్యోగార్థుల్లో కొందరు విధ్వంసానికి పాల్పడ్డారు. ఆగి ఉన్న ఓ రైలును తగలబెట్టారు. ఆర్ఆర్బీ ఎన్టీపీసీ పరీక్షల్లో అవకతవకలు జరిగాయని, పరీక్షలను రద్దు చేయాలని వారు డిమాండ్ చేస్తున్నారు.
ఆందోళనల్లో భాగంగా గయా జంక్షన్లో ఆందోళనకారులు గుమిగూడారు. రైల్వే బోర్డుకు వ్యతిరేకంగా నినాదాలు చేస్తూ భాభువా-పట్నా ఇంటర్ సిటీ ఎక్స్ప్రెస్కు నిప్పంటించారు. అయితే రైలులో ఎవరూ లేకపోవడం వల్ల ఎలాంటి ప్రాణనష్టం జరగలేదు. ఘటన సమయంలో రైలు యార్డ్లో పార్కు చేసి ఉందని, కొందరు దుండగులు దానికి నిప్పంటించారని తూర్పు మధ్య రైల్వే సీపీఆర్వో రాజేశ్ కుమార్ తెలిపారు. కొంతమంది నిరసనకారులను పోలీసులు అదుపులోకి తీసుకున్నారు.
రైల్వే మంత్రి స్పందన
బిహార్ సహా ఉత్తర్ప్రదేశ్, ఝార్ఖండ్లో అభ్యర్థుల ఆందోళనలపై రైల్వే మంత్రి అశ్వని వైశ్ణవ్ స్పందించారు. ఉద్యోగార్థులు సంయమనం పాటించాలని సూచించారు. ప్రభుత్వ ఆస్తుల్ని ధ్వంసం చేస్తే చట్టపరమైన చర్యలు తీసుకుంటామని హెచ్చరించారు. మీ ఆస్తుల్ని మీరే ధ్వంసం చేసుకోద్దని యువతకు సూచించారు. ఆర్ఆర్బీ పరీక్షల్లో అవకతవకలు జరిగాయని వస్తున్న ఆరోపణలపై విచారణ జరిపిస్తామని, అభ్యర్థుల ఫిర్యాదులను పరిగణనలోకి తీసుకుని వీలైనంత త్వరగా పరిష్కరించేందుకు కృషి చేస్తామని చెప్పారు. అభ్యర్థులు తమ ఫిర్యాదులను అధికారికంగా రైల్వే బోర్డుకు సమర్పించాలని పేర్కొన్నారు.
" అభ్యర్థులు చట్టాన్ని తమ చేతుల్లోకి తీసుకోవద్దని విజ్ఞప్తి చేస్తున్నా. మీరు లేవనెత్తిన విషయాలను తీవ్రంగా పరిశీలిస్తాం. అభ్యర్థుల ఇబ్బందుల గురించి తెలుసుకోవాలని ఆర్ఆర్బీ ఛైర్మన్కు సూచించాం. దీనిపై నివేదిక రూపొందించి కమిటీకి అందించాలని చెప్పాం. ఫిర్యాదుల కోసం ఓ ఈమెయిల్ అడ్రస్ను ఏర్పాటు చేశాం. కమిటీ దేశంలోని వివిధ ప్రాంతాలకు వెళ్లి అభ్యర్థుల సమస్యల గురించి తెలుసుకుంటుంది. "
-అశ్వని వైష్ణవ్, రైల్వే మంత్రి
ఎన్టీపీసీ, లెవెల్ 1 పరీక్ష వాయిదా..
అభ్యర్థుల నుంచి తీవ్ర నిరసనలు వ్యక్తం అవుతున్న నేపథ్యంలో ఆర్ఆర్బీ ఎన్టీపీసీ, లెవెల్ 1 పరీక్షలకు తాత్కాలికంగా వాయిదా వేస్తున్నట్లు రైల్వే శాఖ అధికార ప్రతినిధి తెలిపారు. అభ్యర్థుల ఫిర్యాదులు పరిశీలించేందుకు ఉన్నత స్థాయి కమిటీని ఏర్పాటు చేస్తున్నట్లు పేర్కొన్నారు. పరీక్షలో పాస్ అయిన, ఫెయిల్ అయిన అభ్యర్థుల ఫిర్యాదులను స్వీకరిస్తామని చెప్పారు. అనంతరం నివేదిక రూపొందించి రైల్వే బోర్డుకు సమర్పించనున్నట్లు వివరించారు.
" అభ్యర్థుల ఇబ్బందులు, లేవనెత్తిన అనుమానాలను పరిశీలించేందుకు ఉన్నత స్థాయి కమిటీని ఏర్పాటు చేస్తున్నాం. మొదటి దశ ఫలితాలు, ఎంపిక విధానాన్ని కూడా కమిటీ పరిశీలిస్తుంది. అభ్యర్థులు తమ ఫిర్యాదులను rrbcommittee@railnet.gov.in ఈమెయిల్కు పంపవచ్చు. ఫిబ్రవరి 16 వరకు ఫిర్యాదులు, సలహాలను కమిటీ స్వీకరిస్తుంది. వీటిని పరిశీలించిన తర్వాత మార్చి 4లోగా కమిటీ తమ సిఫారసులు రైల్వే బోర్డుకు తెలియజేస్తుంది."
-రైల్వే బోర్డు అధికార ప్రతినిధి.
ఈ నేపథ్యంలో ఫిబ్రవరి 15నుంచి జరగాల్సిన ఆర్ఆర్బీ ఎన్టీపీసీ రెండో దశ పరీక్ష, ఆర్ఆర్సీ మొదటి దశ పరీక్షలను తాత్కాలికంగా వేస్తున్నట్లు రైల్వే బోర్డు వెల్లడించింది.
నిరసనలు అందుకే..
ఆర్ఆర్బీ ఎన్టీపీసీ పరీక్షను రెండు దశల్లో నిర్వహించడాన్ని అభ్యర్థులు తీవ్రంగా వ్యతిరేకిస్తున్నారు. ఇలా చేస్తే ఆర్ఆర్బీ ఎన్టీపీసీ తొలిదశ కంప్యూటర్ ఆధారిత పరీక్ష(CBT)ను రాసి అర్హత సాధించిన వారిని మోసం చేసినట్లే అవుతుందని వారు ఆరోపిస్తున్నారు. జనవరి 15న తొలిదశ పరీక్ష ఫలితాలు వెలువడ్డాయి. అప్పటి నుంచి దేశవ్యాప్తంగా నిరసనలు మొదలయ్యాయి.
ఆర్ఆర్బీ ఎన్టీపీసీ లెవెల్ 2 నుంచి లెవెల్ 6 వరకు 35,000 పోస్టుల కోసం 1.25కోట్ల మంది అభ్యర్థులు దరఖాస్తు చేశారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
