కాంగ్రెస్ అధికారంలోకి వస్తే ఆర్టికల్ 370 రద్దు అంశంపై పునరాలోచిస్తామని ఆ పార్టీ సీనియర్ నేత దిగ్విజయ్ సింగ్ చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి. ఈ ప్రకటనపై భాజపా మండిపడింది. ఇదంతా టూల్కిట్లో భాగమేనని వ్యాఖ్యానించింది. కాంగ్రెస్ పార్టీ తన పేరును దేశ వ్యతిరేక క్లబ్హౌస్గా మార్చుకోవాలని చురకలంటించారు.
దిగ్విజయ్ సింగ్ ఓ పాకిస్థానీ జర్నలిస్ట్తో మాట్లాడారని ఆరోపిస్తూ ఓ క్లబ్హౌస్ చాట్ను బహిర్గతం చేశారు భాజపా నేత అమిత్ మాలవీయ. దీనిపై స్పందించిన భాజపా జాతీయ ప్రతినిధి సంబిత్ పాత్ర.. కాంగ్రెస్ లక్ష్యంగా తీవ్ర విమర్శలు చేశారు.
"ఇదే దిగ్విజయ్ సింగ్ గతంలో పుల్వామా దాడిని ప్రమాదంగా పేర్కొన్నారు. 26/11 దాడులను ఆరెస్సెస్ కుట్ర అని అభివర్ణించారు. ఆ సమయంలో పాకిస్థాన్కు క్లీన్ చిట్ ఇచ్చేందుకు ప్రయత్నించారు. ఇప్పుడేమో.. మోదీ గద్దెదిగి, కాంగ్రెస్ అధికారంలోకి వస్తే ఆర్టికల్ 370ని పునరుద్ధరిస్తామని ఆయన చెబుతున్నారు. ఇదంతా టూల్కిట్లో భాగం."
- సంబిత్ పాత్ర, భాజపా ప్రతినిధి
దిగ్విజయ్ వ్యాఖ్యలను జమ్ముకశ్మీర్ మాజీ డిప్యూటీ సీఎం కవీందర్ గుప్తా ఖండించారు. కాంగ్రెస్ నేతలు పాకిస్థాన్ భాషలో మాట్లాడుతున్నారని మండిపడ్డారు. పాకిస్థాన్ సైతం ఆర్టికల్ 370ని పునరుద్ధరించాలని కోరుకుంటోందని అన్నారు.
మరోవైపు, కశ్మీరీల నుంచి దేశభక్తిని నేర్చుకోవాలంటూ దిగ్విజయ్కు చురకలంటించారు కేంద్ర మంత్రి హర్దీప్ సింగ్ పూరి.
దిగ్విజయ్ ఏమన్నారంటే?
ఆర్టికల్ 370 రద్దు చేయడం, జమ్ముకశ్మీర్ను కేంద్ర పాలిత ప్రాంతంగా విభజించడం బాధాకరమని దిగ్విజయ్ పేర్కొన్నారు. ఓ క్లబ్హౌస్ చాట్లో మాట్లాడుతూ ఈ వ్యాఖ్యలు చేశారు. ఆర్టికల్ 370 రద్దు చేసినప్పుడు కశ్మీర్లో ప్రజాస్వామ్యం, మానవత్వం నశించాయని.. ప్రతి ఒక్కరినీ నిర్బంధించారని అన్నారు. ప్రభుత్వ సర్వీస్లలో కశ్మీర్ పండిట్లకు రిజర్వేషన్లు ఉండేవని చెప్పారు. కాంగ్రెస్ అధికారంలోకి వస్తే ఈ విషయంపై తప్పక దృష్టిసారిస్తుందని పేర్కొన్నారు.
ఇదీ చదవండి: 370 రద్దును కశ్మీరీలు ఆమోదించినట్లేనా?
