కేంద్ర ప్రభుత్వం తీసుకొచ్చిన నూతన సాగు చట్టాలపై మరోమారు విమర్శలు గుప్పించారు దిల్లీ ముఖ్యమంత్రి అరవింద్ కేజ్రీవాల్. ద్రవ్యోల్బణం తీవ్ర స్థాయికి చేరుకునేందుకు కొత్త చట్టాలు కారణమవుతాయని ఆరోపించారు. వ్యవసాయ చట్టాలు.. రైతులు, సామాన్యులకు వ్యతిరేకమని, కొంత మంది పెట్టుబడి దారులకే మేలు చేసేలా ఉన్నాయని పేర్కొన్నారు.
రైతులకు మద్దతుగా ఆప్ నాయకులు, ఎమ్మెల్యేలు, వలంటీర్లు పార్టీ కార్యాలయంలో చేపట్టిన ఒకరోజు నిరాహార దీక్షలో పాల్గొన్న సందర్భంగా ఈ మేరకు వ్యాఖ్యానించారు కేజ్రీవాల్.
" ప్రజలకు కావాల్సినంత నిల్వ చేసుకోవచ్చని ఈ చట్టం చెబుతోంది. రైతుల సమస్యపై రాజకీయాలు చేయటం ఆపాలని అన్ని పార్టీలను కోరుతున్నా. ఈ చట్టాలు రైతులు, సామాన్య ప్రజలకు వ్యతిరేకం. కేవలం కొంత మంది పెట్టుబడి దారులకు లబ్ధి చేకూరేలా ఉన్నాయి. అధికంగా నిల్వచేయటం ద్వారా ద్రవ్యోల్బణం తీవ్రస్థాయికి చేరుకుంటుంది. ధరలు పెంచేందుకు ఈ చట్టాలు లైసెన్సులు ఇస్తాయి. ఈ చట్టాల వల్ల కొనాళ్లలోనే గోధుమలు నాలుగు రేట్ల ఖరీదవుతాయి. రైతులకు మద్దతుగా నిలిచి సాయం చేస్తున్నట్లు ఆనుకోవద్దు. రైతులే ఆందోళనలు చేసి సాయం చేస్తున్నారు. "
- అరవింద్ కేజ్రీవాల్, దిల్లీ ముఖ్యమంత్రి.
ఆమ్ ఆద్మీ పార్టీ రైతులకు మద్దతుగా నిలుస్తుందన్నారు కేజ్రీవాల్. దేశవ్యాప్తంగా ఆప్ వలంటీర్లు రైతులతో పాటు నిరాహార దీక్షలో పాల్గొని వారికి సంఘీభావం తెలిపారని చెప్పారు. రైతులకు మద్దతుగా నిలవటం వల్ల తనపై కేంద్రం ఆగ్రహంగా ఉందన్నారు. మైదానాలు తాత్కాలిక జైళ్లుగా మార్చేందుకు ఇవ్వాలని కోరగా.. తాము నిరాకరించామని గుర్తు చేశారు.
ఇదీ చూడండి: 'నిరాహార దీక్ష'తో కేంద్రానికి రైతుల హెచ్చరిక
