LPG cylinder blast: భార్యతో గొడవ పడిన ఓ వ్యక్తి.. గ్యాస్ సిలిండర్ పేల్చుకుని ఆత్మహత్యకు పాల్పడ్డాడు. కాపాడేందుకు వచ్చిన ఇద్దరు పోలీసులకు ముఖం, తలపై తీవ్ర గాయాలయ్యాయి. ఈ సంఘటన కర్ణాటక, తుమకూర్ జిల్లాలోని సోరేకుంటే గ్రామంలో గురువారం రాత్రి జరిగింది.
ఇదీ జరిగింది: గ్రామానికి చెందిన గోవిందప్ప గురువారం రాత్రి తన భార్యతో గొడవపడ్డాడు. ఈ క్రమంలోనే.. తాను ఆత్మహత్య చేసుకుంటున్నానంటూ ఇంట్లోకి వెళ్లి తలుపులు వేసుకున్నాడు. ఈ విషయాన్ని ఇరుగుపొరుగు వారికి తెలియజేసింది అతడి భార్య. వారు పోలీసులకు సమాచారం అందించారు. రూరల్ పోలీస్ స్టేషన్ హెడ్కానిస్టేబుల్ గవిరంగప్ప, డ్రైవర్ గులిపప్ప తమ సిబ్బందితో సంఘటనాస్థలానికి చేరుకున్నారు. ఆత్మహత్య చేసుకుంటానని బెదిరించిన గోవిందప్పను ఒప్పించి బయటకు తీసుకొచ్చేందుకు కిటికీలోంచి మాట్లాడే ప్రయత్నం చేశారు. కానీ వారి ప్రయత్నాలు ఫలించలేదు. ఇంట్లోని సిలిండర్ గ్యాస్ లీక్ చేసిన గోవిందప్ప.. లైటర్ వెలిగించాడు. వెంటనే మంటలు అంటుకుని సిలిండర్ పేలిపోయింది. కిటికీలోంచి లోపలకు చూస్తున్న ఇద్దరు పోలీసుల ముఖం, తలపై కాలిన గాయాలయ్యాయి.
ఈ పేలుడులో దాదాపు పూర్తిగా కాలిన గాయాలతో కొన ఊపిరితో ఉన్న గోవిందప్పను బెంగళూరు ఆసుపత్రికి తరలిస్తుండగా మార్గమధ్యలోనే ప్రాణాలు కోల్పోయాడు. గాయపడిన పోలీసులను తుమకూర్ జిల్లా ప్రభుత్వ ఆసుపత్రిలో చికిత్స అందిస్తున్నారు. వారి పరిస్థితి విషమంగానే ఉన్నట్లు వైద్యులు తెలిపారు. రూరల్ పోలీస్ స్టేషన్లో కేసు నమోదు చేసి దర్యాప్తు చేపట్టారు.
ఇదీ చూడండి: డీజిల్ ట్యాంకర్-ట్రక్కు ఢీ.. 9 మంది సజీవ దహనం
బడి చుట్టూ నీరు.. పడవలో వెళ్తేనే పాఠం.. పాపం అక్కడి పిల్లలు...
