తెలుపు రంగులో బాలుడి రక్తం.. వైద్య రంగానికే పరీక్ష!

ఆరోగ్యకరమైన వ్యక్తి శరీరంలో ఎర్ర రక్తకణాలతో పాటు.. తెల్ల రక్తకణాలు రెండూ కనిపిస్తాయి. దీంతో రక్తం ఎరుపు రంగులో ఉంటుంది. దీనికి భిన్నంగా రాజస్థాన్​లోని జైపుర్‌లో ఒక చిన్నారి రక్తం తెలుపు రంగులో ఉండటం వైద్యులనే ఆశ్చర్యానికి గురు చేసింది. వైద్య రంగంలో ఇలాంటి సంఘటన ఎదురవటం అరుదు అని వైద్యులు చెబుతున్నారు.

రాజస్థాన్​ రాజధాని జైపుర్‌లోని జేకే లోన్ ఆసుపత్రి.. వార్తల్లో నిలిచింది. అందుకు కారణం.. ఈ ఆసుపత్రిలో చికిత్స పొందుతున్న ఓ బాలుడు. వైద్య రంగానికే ఆశ్చర్యం కలిగించేలా ఆ చిన్నారి రక్తం తెలుపు రంగులో ఉంది. అలా ఎందుకు ఉందో వైద్యులే తేల్చలేని పరిస్థితి.

కొద్దిరోజుల క్రితం వింత వ్యాధితో బాధపడుతోన్న 3 నెలల చిన్నారిని జైపుర్​లోని జేకే లోన్ ఆసుపత్రిలో చేర్పించారు. వైద్య పరీక్షల కోసం బాలుడి రక్తం తీసుకోగా.. తెల్లటి రంగులో కనిపించింది. దీంతో అక్కడి వైద్యులు ఆశ్చర్యపోయారు. రక్తం తెల్లగా ఎందుకుంది? ఆ బాలుడు ఎలా జీవించగలుగుతున్నాడు? వంటి అనేక ప్రశ్నలు వైద్యుల మెదళ్లను తొలిచివేశాయి.

సాధారణంగా రక్తంలో ఉండే ఎర్ర రక్తకణాల ద్వారా మానవుని శరీరంలోకి ఆక్సిజన్ ప్రవేశిస్తుంది. మరి ఆ రక్తమే తెల్లగా ఉంటే..? జీవశాస్త్రంలో దీనిపై ఇంతకముందు ఏమైనా పరిశోధనలు జరిగాయా? ఇలాంటివి వైద్యుల ముందు ఎన్నో సవాళ్లు ఎదురయ్యాయి.

" బాలుడి రక్తం తెల్లగా ఉంది. ఇటువంటి అరుదైన వ్యాధిని చూడటం ఇదే మొదటిసారి. ఆసుపత్రిలో చేరిన వెంటనే రక్త నమూనాలను సేకరించగా తెల్లగా కనిపించింది. ఇది చాలా అరుదైన కేసు."

- డాక్టర్ అశోక్ గుప్తా, అరుదైన వ్యాధుల విభాగాధిపతి- జేకే లోన్​ ఆసుపత్రి.

సాధారణంగా ఈ వయస్సు పిల్లల్లో కొవ్వుశాతం తక్కువగా ఉంటుంది. అయితే ఈ బాలుడిలో మూడు నెలలకే కొవ్వుశాతం అధికంగా ఉందని.. డైస్లీపీడీయా లక్షణాలు కనిపిస్తున్నాయని వైద్యులు గుర్తించారు. దాని వల్లే ఇలా జరిగి ఉండొచ్చని భావిస్తున్నారు.

ఇదీ చదవండి: కళ్లు లేకపోయినా 40 ఏళ్లుగా మిల్లు నడుపుతూ..