తోపుడుబండిపై గర్భిణీ.. కష్టపడి ఆస్పత్రికి తీసుకెళ్తే డాక్టర్, నర్స్ ఆబ్సెంట్

మధ్యప్రదేశ్​లోని దామోహ్​ జిల్లాలో హృదయవిదారక ఘటన వెలుగుచూసింది. అంబులెన్స్​ గ్రామంలోకి రాకపోవడం వల్ల గర్భిణీని తోపుడుబండిపై ఆస్పత్రికి తీసుకెళ్లాడు ఓ భర్త. అంత కష్టపడి వెళ్లాక ప్రసవం చేసే డాక్టర్, నర్స్​ విధులకు గైర్హాజరు కావడం వల్ల జిల్లా ఆస్పత్రికి తరలించాడు. రానేహ్​ ప్రాంతానికి చెందిన కైలాస్​ భార్య కాజల్ నిండు గర్భిణీ. ఆమెకు మంగళవారం పురిటి నొప్పులు రావడం వల్ల కైలాస్​​​.. అంబులెన్స్​కు కాల్​ చేశాడు. ఎన్నిసార్లు కాల్ చేసినా గ్రామంలోకి అంబులెన్స్​ రాలేదు. దీంతో చేసేదేం లేక తోపుడుబండిపై ఆమెను పడుకోబెట్టి కిలోమీటరు దూరంలో ఉన్న ప్రాథమిక ఆస్పత్రికి తీసుకెళ్లాడు. తీరా అక్కడికి వెళ్లాక ఆస్పత్రిలో వైద్యుడు, నర్స్​ అందుబాటులో లేరు. అందుకే ప్రసవం చేయడం కుదరని ఆమెను​ అక్కడి సిబ్బంది.. జిల్లా ఆస్పత్రికి రిఫర్​ చేశారు. ఈ ఘటనపై జిల్లా మెడికల్​ ఆఫీసర్​ ఆర్​పీ కోరి స్పందించారు. ఏం జరిగిందో ఆరా తీసి సమగ్ర విచారణ చేపడతామని చెప్పారు.