Man Washed Away In Waterfall : చూస్తుండగానే జలపాతంలో కొట్టుకుపోయిన యువకుడు.. లైవ్​ వీడియో

Man Washed Away In Waterfall Live Video : విహారయాత్ర కోసం వెళ్లిన నలుగురు స్నేహితుల్లో ఒకరు జలపాతంలో కొట్టుకుపోయారు. ఈ ఘటన హిమాచల్ ​ప్రదేశ్​లోని కాంగ్​డా జిల్లాలో జరిగింది. ధర్మశాల నగరంలోని భాగ్సునాగ్​ జలపాతానికి విహారయాత్ర కోసం పంజాబ్​ జలంధర్​కు చెందిన నలుగురు స్నేహితులు వెళ్లారు. ఈ క్రమంలోనే జలపాతం​లో కాసేపు సరదాగా గడిపేందుకు నీటిలోపలికి దిగారు. ఈ సమయంలోనే జలపాతం పైనుంచి ఒక్కసారిగా నీటి ఉద్ధృతి పెరగడం వల్ల నలుగురు నీటిలో చిక్కుకుపోయారు. ఈ సమయంలో జలపాతాన్ని చూసేందుకు వచ్చిన కొందరు సందర్శకులు, స్థానికులు వారిని గమనించి బయటకు రావాల్సిందిగా కేకలు వేశారు. దీంతో వారు ఒక్కొక్కరిగా బయటకు వచ్చే ప్రయత్నం చేశారు. ఈ ప్రయత్నంలో ముగ్గురు స్నేహితులు ప్రాణాలు కాపాడుకోగా.. మరో మిత్రుడు 32 ఏళ్ల పవన్​ కుమార్​ నీటి ప్రవాహానికి కొట్టుకుపోయాడు. అనంతరం సమాచారం అందుకున్న పోలీసులు గల్లంతైన యువకుడి మృతదేహాన్ని జలపాతానికి 200 మీటర్ల దిగువన వెలికితీసి స్వాధీనం చేసుకున్నారు. పోస్ట్​మార్టం నిర్వహించిన అనంతరం మృతదేహాన్ని కుటుంబసభ్యులకు అప్పగిస్తామని కాంగ్​డా ఏఎస్పీ వీర్ బహదూర్ తెలిపారు. అయితే జలాశయం నీటి ప్రవాహం ఉవ్వెత్తున పెరగడానికి ఇటీవల రాష్ట్రంలో కురిసిన వర్షాలు కారణమని ఆయన చెప్పారు. ఈ ఘటనపై కేసు నమోదు చేసుకున్న పోలీసులు దర్యాప్తు చేపట్టారు.