Janasena Venkateswara Rao comments on CM Jagan : జగన్​కు గుంటూరులో పవన్​పై పోటీ చేసే దమ్ముందా : జనసేన వెంకటేశ్వరరావు

Janasena Venkateswara Rao's comments on CM Jagan : ముఖ్యమంత్రి చెప్పే సామాజిక న్యాయం మాటల్లో తప్ప చేతల్లో లేదని జనసేన గుంటూరు జిల్లా అధ్యక్షుడు గాదె వెంకటేశ్వరరావు విమర్శించారు. గుంటూరులోని పార్టీ కార్యాలయంలో ఆయన మీడియాతో మాట్లాడారు. విజయవాడలో జరిగిన వైసీపీ ప్రతినిధుల సభలో సీఎం జనసేన గురించి చేసిన వ్యాఖ్యలపై గాదె మండిపడ్డారు. జనసేనకు బలం లేకపోతే సీఎం ఎందుకు పదేపదే పవన్ గురించి మాట్లాడతారని ప్రశ్నించారు. 10చోట్ల కూడా అభ్యర్థులు లేరంటున్న సీఎం.. గుంటూరు జిల్లాలో ఏ నియోజకవర్గంలోనైనా పవన్ పై పోటీ చేసే దమ్ముందా అని సవాల్ విసిరారు.  

నా ఎస్సీ, నా ఎస్టీ, నా బీసీ అని మాట్లాడే సీఎం వెనక ఉండేదంతా రెడ్లేనని వ్యాఖ్యానించారు. కార్పోరేషన్ ఛైర్మన్ పదవుల్ని ఎందుకు బీసీ, ఎస్సీలకు ఇవ్వలేదో చెప్పాలన్నారు. ఆడుదాం ఆంధ్ర అంటూ రాష్ట్ర ప్రజలతో ఆటలాడుతున్నారని ఎద్దేవా చేశారు. విజయవాడలో వైసీపీ ప్రతినిధుల సభ ఖర్చు ఎవరిదో శ్వేతపత్రం విడుదల చేయాలన్నారు. రాష్ట్రంలో ప్రజారోగ్యం పట్ల ముఖ్యమంత్రికి చిత్తశుద్ధి ఉంటే గుంటూరు జీజీహెచ్ లో పరిస్థితి చూసేందుకు రావాలని సవాల్ విసిరారు.