reason for cheating in a relationship : పెళ్లైన వారు భాగస్వామిని ఎందుకు మోసగిస్తారో తెలుసా.. 5 కారణాలు ఇవే!

Reason For Cheating In Relationship : జీవితాంతం కష్టసుఖాల్లో ఒకరికొకరం తోడుగా ఉంటామని ప్రమాణం చేసినవారు.. భాగస్వామిని ఎందుకు చీట్ చేస్తారు..? సాఫీగా సాగిపోవాల్సిన సంసారాలు.. వివాహేతర సంబంధాల వైపు ఎందుకు టర్న్ తీసుకుంటాయి..? భార్యాభర్తల్లో చాలా మంది తమ పార్ట్​నర్​ను మోసం చేస్తారెందుకు..? అంటే.. దీనికి చాలా కారణాలుంటాయి. ఇందులో ప్రధానమైన 5 రీజన్స్ ఇక్కడ చూద్దాం.

Reason For Cheating In Relationship : పెద్దల సమక్షంలో.. బంధు మిత్రుల సాక్షిగా.. తాము నమ్మి ఆచరించే మత విశ్వాసాల ప్రకారం.. ఆడ, మగ ఇద్దరూ భార్యాభర్తలుగా మారుతారు. జీవితాంతం కష్టసుఖాల్లో తోడుగా ఉంటామని ప్రమాణం చేసిన వారు.. ఆ తర్వాత "తప్పు"టడుగులు వేస్తుంటారు. తాత్కలిక సుఖాల కోసం.. భాగస్వామికి నమ్మక ద్రోహం చేస్తుంటారు. ఈ "తప్పులే" సంసారాలను ఛిన్నాభిన్నం చేస్తాయి. చివరకు.. హత్యలు, ఆత్మహత్యలకూ దారితీస్తాయి. పిల్లలను అనాథలను కూడా చేస్తాయి. మరి.. ఇంతటి దారుణ పరిస్థితులకు.. తొలి అడుగు ఎక్కడ పడుతుంది? ఎందుకు ఇలా మారిపోతారు? అనే ప్రశ్నలకు చాలా కారణాలుంటాయని చెబుతున్నారు మానసిక నిపుణులు. అందులో ముఖ్యమైన 5 కారణాలు తెలుసుకుందాం.

1. దంపతుల మధ్య ప్రేమ లేకపోవడం..
భార్యాభర్తల మధ్య అనుబంధాన్ని దెబ్బతీసే అంశాల్లో మొదటిది.. ఒకరిపై మరొకరికి ప్రేమ లేకపోవడం. ఇష్టం లేని వారికి ఇచ్చి పెళ్లి చేయడం.. బలవంతంగా ఇద్దరికీ ముడివేయడం.. పెళ్లికి ముందే మరొకరిని ప్రేమించడం.. వంటి కారణాలతో.. భార్యాభర్తల మధ్య ప్రేమ ఉండదు. ప్రేమ లేకపోతే ఏ బంధమైనా కాలం గడిచేకొద్దీ ముక్కలైపోతుంది. అందుకే.. దంపతుల మధ్య ప్రేమ అనివార్యం. ఒకరిపై ఒకరికి ఇష్టం లేకపోతే.. ఆ బంధం కలకాలం సజావుగా సాగే అవకాశాలు తక్కువ అంటున్నారు నిపుణులు.

2. లైంగిక అవసరాలు..
నిద్రహారాల తర్వాత మనిషికి సెక్స్ అనేది అత్యంత అవసరం. అందుకే.. పెళ్లి అనేది శృంగారానికి "లైసెన్స్" అనేవాళ్ల సంఖ్య కూడా పెద్దగానే ఉంది. దంపతుల మధ్య చక్కటి శృంగారం ఉండాల్సిందే. భాగస్వామి లైంగిక కోరికలను తీర్చలేకపోతే.. పక్క చూపులు చూడాల్సిన పరిస్థితులు రావొచ్చని అంటున్నారు. కుటుంబం, సంప్రదాయాలు, కట్టుబాట్లకు తలొగ్గి కొందరు అలాగే ఉండిపోతారు. కానీ.. కొందరు మాత్రం ఆ గీతను దాటేస్తారు. తమ లైంగిక అవసరాలను తీర్చుకోవడానికి వివాహేతర సంబంధాలను కొనసాగిస్తారు.

3. ఆధిపత్య ధోరణి..
దాంపత్యంలో.. ఇద్దరూ ఒకరినొకరు అర్థం చేసుకోవాలి. ఒకరికోసం మరొకరు బతకాలి. ఒకరి ఇష్టాలు మరొకరి ఇష్టంగా మారాలి. అప్పుడే ఆ బంధం సంతోషంగా ముందుకు సాగుతుంది. కానీ.. చాలా జంటల్లో ఆధిపత్య పోరు కొనసాగుతూ ఉంటుంది. నువ్వా? నేనా? అన్నట్టుగా వ్యవహరిస్తుంటారు. ఈ ధోరణి క్రమంగా ఇద్దరి మధ్యా దూరం పెంచుతుంది. మనసు విప్పి మాట్లాడుకోవడం అనేదే ఉండదు. పని నుంచి ఇంటికి రాగానే ప్రేమగా మాట్లాడుకోవడానికి బదులు.. చిరాకులు, అవమానాలు రాజ్యమేలుతాయి. ఇలాంటి పరిస్థితులు తారస్థాయికి చేరినప్పుడు.. ఇంట్లో మనశ్శాంతి, ప్రేమ కరువైందని మనసు భావించినప్పుడు.. అడుగు గడపదాటుతుంది. ఒకరి కోసం మరొకరు బతికినప్పుడు.. ఇలాంటి పరిస్థితి రాదు.

4. ఆశలు నెరవేరకపోవడం..
జీవిత భాగస్వాములు ఒకరిపై మరొకరు ఎక్స్​పెక్టేషన్స్​ పెట్టుకుంటారు. అవి చిన్నవైతే పర్వాలేదు. కానీ.. కొందరు ఆకాశానికి నిచ్చెన వేసేలా అంచనాలు పెట్టుకుంటారు. ఆశలు చాలా పెద్దగా ఉంటాయి. అవి.. అందం నుంచి మొదలు పెడితే ఆస్తులు, అంతస్తుల వరకూ ఉంటాయి. ఇవి సాధించడంలో విఫలమైనప్పుడు.. భాగస్వామిని నిందించడం మొదలు పెడతారు. ఇది ఎంత తీవ్రమైతే.. వారి మధ్య దూరం అంతగా పెరుగుతుంది. సరిగ్గా ఇలాంటి సమయంలో మూడో వ్యక్తి ప్రవేశిస్తే.. బంధానికి బీటలు వారడం ఖాయమవుతుంది. అందుకే.. భాగస్వాములు ఆశల్లో విహరించకుండా.. భ్రమల్లో బతక్కుండా.. వాస్తవంలో జీవించాలి. ఉన్నదాంట్లో సంతృప్తిని వెతుక్కుంటూ.. భవిష్యత్తు లక్ష్యాలవైపు కలిసి అడుగులు వేస్తే ఈ సమస్య రాదు.

5. ఇతరుల పట్ల ఆకర్షణ..
"ఆకర్షణ.." ఇది చాలా పెద్ద విష వలయం. ఒకరు అందం చూసి.. మరొకరు ఆస్తులు చూసి.. ఇంకొకరు మాటలు చూసి.. అవతలి వ్యక్తులకు ఆకర్షితులవుతుంటారు. ఇంట్లో బంధం బలహీనంగా ఉన్నప్పుడు.. ఈ పని మరింత వేగంగా జరిగిపోతుంది. నష్టం జరిగిన తర్వాత గానీ అసలు విషయం అర్థం కాదు. కానీ.. అప్పటికే పూడ్చలేని తప్పు జరిగిపోయి ఉండొచ్చు. అందుకే.. ఆకర్షణ శాశ్వతం కాదు. అది కాలక్రమంలో డైల్యూట్ అయిపోతుంది. కానీ.. భార్యాభర్తల బంధం, వారి మధ్య ప్రేమ మాత్రమే శాశ్వతం.

ఈ విషయాలు తెలియని వారు.. ఆవేశంలోనో.. ఆకర్షణలోనో.. ప్రతీకార చర్యలో భాగంగానో.. భాగస్వామిని మోసం చేస్తుంటారు. కానీ.. ఈ చీటింగ్ వ్యవహారాల క్లైమాక్స్.. ఎప్పుడైనా విషాదంగానే ఉంటుంది. విడిపోవడం నుంచి.. హత్యలు, ఆత్మహత్యల వరకూ దారితీస్తాయి. అందుకే.. ఏ సమస్య వచ్చినా ఇద్దరూ కలిసి మాట్లాడుకొని, ఒకరినొకరు ప్రేమిస్తూ, గౌరవిస్తే.. ఆ బంధానికి తప్పకుండా శుభం కార్డు పడుతుంది. లేదంటే.. తెగిన గాలిపటంలా.. ఏ ముళ్లపొదల్లో చిక్కుకొని, ఏ కరెంటు తీగలకో వేలాడినట్టుగా.. ఆ వివాహ బంధం కూడా దారుణ పరిస్థితుల్లో ముగిసిపోతుందని మానసిక నిపుణులు హెచ్చరిస్తున్నారు.