Surya Kumar Yadav : పొట్టి కప్పు పోటీల్లో ఈ ఏడాది జరిగిన అన్నీ మ్యాచ్లు అభిమానుల్లో ఉత్కంఠ రేపేలా ఉన్నాయి. ఒక దాన్ని మించి మరొకటి అలా కనువిందు చేశాయి అనడం అతిశయోక్తి కాదేమో. అలా 2022లో జరిగిన ఆసియా కప్‌, టీ20 వరల్డ్‌కప్‌ టోర్నీల్లో టీమ్ ఇండియా మిస్టర్‌ 360 ప్లేయర్ సూర్యకుమార్ యాదవ్ తనదైన ప్రతిభతో అభిమానుల మనసులను కొల్లగొట్టాడు. ఆడిన ప్రతి మ్యాచుల్లో బాల్ను బౌండరీ దాటించి ప్రత్యర్థులకు చెమటలు పట్టించాడు. అలా ఈ ఏడాది టీ20ల్లో సూర్యకుమార్ ఆడిన కొన్ని షాట్లు చూసి షాకవ్వడం విశ్లేషకుల వంతు అయ్యింది.
2022లో 31 టీ20 మ్యాచ్లు ఆడిన సూర్యకుమార్.. 46.56 సగటున, 187.43 స్ట్రయిక్‌ రేట్‌తో 1164 పరుగులు సాధించాడు. వాటిలో రెండు సెంచరీలు, 9 ఆఫ్ సెంచరీలు ఉన్నాయి. అలా క్రీజులో విజృంభించిన ఈ ఏస్ ప్లేయర్ సూర్యకుమార్ ఈ ఏడాది టీ20ల్లో అత్యధిక పరుగుల(1164)తో పాటు అత్యధిక సిక్సర్లు (98) బాదిన ప్లేయర్గా కొనసాగుతున్నాడు. మొత్తం మీద 42 టీ20లు ఆడిన 'స్కై'.. 44 సగటున, 181 స్ట్రయిక్‌ రేట్‌తో 1408 పరుగులు చేశాడు. అలా తన టీ20 కెరీర్‌లో 2 సెంచరీలు..12 హాఫ్‌ సెంచరీలు ఉన్నాయి. ఇవే కాకుం‍డా సూర్య ఈ ఏడాది టీ20ల్లో ఎన్నో రికార్డులతో పాటు మరెన్నో రివార్డులను సొంతం చేసుకున్నాడు. జట్టులోకి వచ్చిన కొద్ది సమయంలోనే స్టార్గా ఎదిగిన స్కై.. టీమ్ఇండియాలో మంచి ప్లేయర్గా పేరు తెచ్చుకున్నాడు.
'స్కై' టాప్ స్కోర్స్ ఇవే..
- వెస్టిండీస్‌తో 7 టీ20ల్లో 179.25 స్ట్రయిక్‌ రేట్‌తో 242 పరుగులు చేశాడు.
- శ్రీలంకతో ఆడిన టీ20లో 117.24 స్ట్రయిక్‌ రేట్‌తో 34 పరుగులు చేశాడు.
- సౌతాఫ్రికాతో 4 టీ20ల్లో అదరగొట్టిన స్కై 185.14 స్ట్రయిక్‌ రేట్‌తో 187 పరుగులు చేశాడు.
- ఐర్లాండ్‌తో 2 టీ20లు పోటీపడిన సూర్యకుమార్.. 250 స్ట్రయిక్‌ రేట్‌తో 15 పరుగులు చేశాడు.
- ఇంగ్లండ్‌తో జరిగిన 4 టీ20ల్లో 180.14 స్ట్రయిక్‌ రేట్‌తో 185 పరుగులు చేశాడు.
- ఆస్ట్రేలియాతో 3 టీ20లు 185.48 స్ట్రయిక్‌ రేట్‌తో 115 స్కోర్.
- న్యూజిలాండ్‌తో 2 టీ20లకు 124 పరుగులు చేశాడు సూర్యకుమార్.
- బంగ్లాదేశ్‌తో ఆడిన టీ20లో 185.50 స్ట్రయిక్‌ రేట్‌తో 30 పరుగులు.
- అఫ్గానిస్థాన్‌ టీ20లో 300 స్ట్రయిక్‌ రేట్‌తో 6 పరుగులు తీశాడు.
- హాంగ్‌కాంగ్‌తో ఆడిన టీ20లో 261.53 స్ట్రయిక్‌ రేట్‌తో 63 పరుగులు స్కోర్ చేశాడు.
- నెదర్లాండ్స్‌తో ఓ టీ20 ఆడిన స్కై 204 స్ట్రయిక్‌ రేట్‌తో 51 పరుగులు సాధించాడు.
- పాకిస్థాన్తో జరిగిన 3 టీ20ల్లో 123.91 స్ట్రయిక్‌ రేట్‌తో 46 పరుగుల స్కోర్.
- జింబాబ్వేతో ఓ టీ20 ఆడిన స్కై.. 244 స్ట్రయిక్‌ రేట్‌తో 61 పరుగులు చేశాడు.
ఈ ఏడాది జరిగిన టీ20 వరల్డ్‌కప్‌ ఆరు 6 మ్యాచ్లు ఆడిన సూర్యకుమార్.. మైదానంలో 189.68 స్ట్రయిక్‌ రేట్‌తో 239 పరుగులు చేశాడు.అలా ఈ మెగా టోర్నీలో మూడో అత్యధిక రన్స్ స్కోరర్‌గా నిలిచాడు. ఆసియా కప్‌-2022లోనూ అదే హహా కొనసాగించిన సూర్యకుమార్ 5 మ్యాచ్‌ల్లో 163.52 స్ట్రయిక్‌ రేట్‌తో 139 పరుగులు సాధించాడు.
