కరోనా వైరస్ మరణాలకు చైనాదే పూర్తి బాధ్యత అని అమెరికా అధ్యక్షుడు డొనాల్డ్ ట్రంప్ పునరుద్ఘాటించారు. ఈ మేరకు ఆయన ప్రతినిధి, శ్వేతసౌధం ప్రెస్ సెక్రటరీ కైలీ మెక్నానీ ఒక ప్రకటన విడుదల చేశారు.
"కరోనా వైరస్పై బాధ్యత చైనాదేనని చెప్పడానికి అధ్యక్షుడు ఎప్పుడు చింతించరు. ఇదే క్రమంలో.. వైరస్ పుట్టుకకు అమెరికా దళాలే కారణమని చైనా చేస్తున్న అసత్య ఆరోపణలను ట్రంప్ ఖండించారు. సైన్యానికి ట్రంప్ అండగా నిలిచారు."
-- కైలీ మెక్నానీ, అధ్యక్షుడి ప్రతినిధి.
గతవారం జరిగిన ర్యాలీలో వైరస్ను 'కుంగ్ ఫ్లూ'గా అభివర్ణించారు ట్రంప్. అది జాతి వివక్ష వ్యాఖ్య అంటూ ట్రంప్ విమర్శలు ఎదుర్కొన్నారు. కైలీ దీనిపై స్పందించారు. అధ్యక్షుడు ఎప్పుడు జాతి వివక్షను ప్రోత్సహించరని, చైనాలో పుట్టుకొచ్చిన వైరస్ గురించే ఆ విధంగా మాట్లాడారని స్పష్టం చేశారు. కుంగ్ ఫ్లూ అనేది ఆసియా-అమెరికన్లను ఉద్దేశించింది కాదన్నారు.
ప్రపంచంలో ఎక్కడా లేనన్ని కరోనా కేసులు, మరణాలు ఒక్క అమెరికాలో నమోదయ్యాయి. అగ్రరాజ్యంలో ఇప్పటివరకు 23,88,153 కేసులు వెలుగుచూశాయి. 1,22,610మంది వైరస్ ధాటికి ప్రాణాలు కోల్పోయారు.
