Online Payment Security Issues : నేటి సాంకేతిక యుగంలో డిజిటల్ చెల్లింపులు అనివార్యం అయిపోయాయి. భౌతికంగా డబ్బులు మరొకరికి పంపించాలంటే.. అది చాలా శ్రమతో కూడుకున్న వ్యవహారం. అదే డిజిటల్ చెల్లింపులు అయితే ఇలాంటి సమస్య రాదు. చక్కగా ఉన్న చోట నుంచే ఆన్లైన్లో డబ్బులు పంపేయవచ్చు. అందుకే నేడు చాలా మంది డిజిటల్ చెల్లింపులకే అధిక ప్రాధాన్యత ఇస్తున్నారు. ఇదే సమయంలో సైబర్ మోసాలు కూడా బాగా పెరిగిపోతున్నాయి. అందుకే డిజిటల్ చెల్లింపులు చేసే ముందు కచ్చితంగా కొన్ని జాగ్రత్తలు తీసుకోవాల్సిన అవసరం ఉంటుంది.
సైబర్ నేరగాళ్లతో జాగ్రత్త
Cyber security for digital payments : సైబర్ నేరగాళ్లు సామాజిక మాధ్యమాల్లో ఏవేవో ఆఫర్లు ప్రకటిస్తూ సందేశాలు పంపిస్తూ ఉంటారు. వాటిని నమ్మి మీ సమాచారాన్ని అందించారో.. ఇక అంతే.. మీ అకౌంట్లోని మొత్తం సొమ్మును కాజేస్తారు. వాస్తవానికి ఒకప్పటితో పోలిస్తే, నేడు డిజిటల్ మోసాల రేటు దాదాపు 28 శాతం వరకు పెరిగినట్లు గణాంకాలు చెబుతున్నాయి. కనుక ఆన్లైన్ చెల్లింపులు చేసే వారు కచ్చితంగా చాలా అప్రమత్తంగా ఉండాలి.
విశ్వసనీయ యాప్లను మాత్రమే వాడాలి!
Most secure payment apps : చాలా మంది ప్లేస్టోర్, యాపిల్ స్టోర్ నుంచి కాకుండా ఇతర అనధికార వేదికల నుంచి పేమెంట్ యాప్లను డౌన్లోడ్ చేస్తూ ఉంటారు. ఇది సెక్యూరిటీ పరంగా ఏ మాత్రం మంచిది కాదు. సాధారణంగా డిజిటల్ పేమెంట్ యాప్లను ఉపయోగించేందుకు మన బ్యాంకు అకౌంట్ నంబర్, క్రెడిట్ లేదా డెబిట్ కార్డు వివరాలు అందించాల్సి ఉంటుంది. అందువల్ల కచ్చితంగా విశ్వసనీయమైన, అధికారిక యాప్లను మాత్రమే ఉపయోగించాల్సి ఉంటుంది. మరీ ముఖ్యంగా మీరు వినియోగిస్తున్న యాప్.. మీ సమాచారాన్ని ఎంత మేరకు వినియోగిస్తుందో తెలుసుకునేందుకు.. కచ్చితంగా అన్ని నియమ, నిబంధనలను చదివి తెలుసుకోవాలి. లేదంటే మీ సమాచారం సైబర్ నేరగాళ్ల చేతిలోకి వెళ్లిపోతుంది. అదే జరిగితే మీ బ్యాంకు ఖాతాలోని సొమ్ము ఖాళీ అవుతుంది.
ఉచిత నెట్వర్క్లను వాడొద్దు!
చాలా మంది ఉచిత వై-ఫై సౌకర్యాన్ని వినియోగించుకునేందుకు ఇష్టపడుతూ ఉంటారు. కానీ బ్యాంకింగ్ వ్యవహారాలు, ఆర్థిక లావాదేవీలు జరిపేటప్పుడు ఎట్టిపరిస్థితుల్లోనూ ఉచిత వై-ఫైని వాడకూడదని సైబర్ నిపుణులు చెబుతున్నారు. అలాగే యూపీఐ యాప్లను వాడుతున్నప్పుడు కూడా ఫ్రీ వై-ఫై వాడకూడదని సూచిస్తున్నారు. ఎందుకంటే, ఆన్లైన్ మోసగాళ్లు ఫోన్లను హ్యాక్ చేసేందుకు ఈ ఉచిత వై-ఫై నెట్వర్క్లనే ఎక్కువగా ఉపయోగిస్తారని సాంకేతిక నిపుణులు హెచ్చరిస్తున్నారు.
రెండు అంచెల రక్షణ
2 step verification for online banking : మొబైల్ ఫోన్ ద్వారా చెల్లింపులు చేయాలనుకుంటే.. కచ్చితంగా 'టూ స్టెప్ వెరిఫికేషన్' (రెండు అంచెల భద్రతా వ్యవస్థ)ను ఏర్పాటు చేసుకోవాలి. ముఖ్యంగా యాప్లో లాగిన్ కావడానికి, లావాదేవీలు జరిపేందుకు వేర్వేరు పాస్వర్డ్లను ఉపయోగించాలి. ఈ పాస్వర్డ్లను కూడా తరచుగా మారుస్తూ ఉండాలి. సురక్షితమైన ఆర్థిక లావాదేవీల కోసం బయోమెట్రిక్స్నూ ఉపయోగించుకోవాలి.
స్ట్రాంగ్ పాస్వర్డ్స్ పెట్టుకోవాలి
Digital Payments Security Tips : చాలా మంది డిజిటల్ పేమెంట్స్ జరిపేందుకు చాలా సాధారణ పాస్వర్డ్లను ఉపయోగిస్తూ ఉంటారు. కానీ ఇది ఏ మాత్రం సురక్షితం కాదు. డిజిటల్ పేమెంట్ యాప్లో ఆర్థిక లావాదేవీలు జరిపేందుకు నాలుగు లేదా ఆరు అంకెల పాస్వర్డ్ను నమోదు చేయాల్సి ఉంటుంది. కచ్చితంగా ఈ నంబర్ మీకు తప్ప మరెవరికీ తెలయకుండా చూసుకోవాలి. అలాగే ఈ పాస్వర్డ్లను తరచుగా మారుస్తూ ఉండాలి.
క్యూఆర్ కోడ్లతో జాగ్రత్త!
QR code based payments : నేడు ప్రతి దుకాణంలో క్యూఆర్ కోడ్లు ఉంటున్నాయి. ఈ కోడ్లను స్కాన్ చేసి, సులభంగా క్షణాల్లో చెల్లింపులు చేసేస్తున్నారు. కానీ ఈ క్యూఆర్ కోడ్ల విషయంలోనూ చాలా జాగ్రత్తగా వ్యవహరించాలి. ఎందుకంటే.. ఈ క్యూఆర్ కోడ్స్ ద్వారా సైబర్ నేరగాళ్లు మన సమాచారాన్ని దొంగిలించే అవకాశం ఉంటుంది.
అందుకే క్యూఆర్ కోడ్ స్కాన్ చేసే విషయంలో చాలా అప్రమత్తంగా ఉండాలి. దుకాణదారుని వివరాలు, పేమెంట్ గేట్వేలో ఉన్న వివరాలు సరిపోయాయా? లేదా? అని చెక్ చేసుకోవాలి. ఆ తరువాత మాత్రమే లావాదేవీలను సురక్షితంగా పూర్తి చేయాలి.
యూపీఐతో ప్రీమియం చెల్లింపులు
టాటా ఏఐఏ లైఫ్ ఇన్సూరెన్స్ వారు తమ పాలసీదారులు సులభంగా ప్రీమియం చెల్లించేందుకు వీలుగా.. ఒక యూపీఐ ఆధారిత చెల్లింపు పద్ధతిని అందుబాటులోకి తెచ్చారు. అలాగే దీని సాయంతో వాట్సాప్లోనూ ప్రీమియం చెల్లింపులు చేయవచ్చని స్పష్టం చేశారు. అలాగే తమ పాలసీలకు సంబంధించిన సమాచారాన్ని తెలుగు భాషలోనూ అందిస్తున్నట్లు చెప్పారు.
