Madhya Pradesh Unemployment: దేశంలో నిరుద్యోగం ఏ స్థాయిలో ఉందో చెప్పడానికి ఈ ఘటనే నిదర్శనం. మధ్యప్రదేశ్ గ్వాలియర్లో 15 ఉద్యోగాల కోసం నోటిఫికేషన్ విడుదల చేసింది ప్రభుత్వం. ఇందులో ప్యూన్లు(బంట్రోతులు), డ్రైవర్లు, వాచ్మ్యాన్ పోస్టులు ఉన్నాయి. అయితే పదులు, వందలు కాదు ఏకంగా 11 వేల మంది నిరుద్యోగ యువకులు దరఖాస్తు చేసుకొని.. నగరంలో వాలిపోయారు. శని, ఆదివారాల్లో భారీ సంఖ్యలో బారులు తీరారు. దరఖాస్తు చేసిన అభ్యర్థుల్లో.. పొరుగు రాష్ట్రం ఉత్తర్ ప్రదేశ్ నుంచి కూడా ఉండటం విశేషం.
ఈ ఉద్యోగాలకు విద్యార్హత పదో తరగతి కాగా.. గ్రాడ్యుయేట్లు, పోస్ట్ గ్రాడ్యుయేట్లు, ఇంజినీర్లు, ఎంబీఏ చేసినవారు, సివిల్ జడ్జి ఉద్యోగం కోసం సిద్ధమవుతున్నవారు కూడా దరఖాస్తు చేశారు.
పీహెచ్డీ చేసినవారు కూడా ఉన్నట్లు అక్కడికి వచ్చిన అభ్యర్థులు చెప్పారు.
''నేను సైన్స్ గ్రాడ్యుయేట్ను. ప్యూన్ ఉద్యోగం కోసం దరఖాస్తు చేశాను. ఇక్కడ లైన్లలో పీహెచ్డీ చేసినవారు కూడా ఉన్నారు.''
- అజయ్ బఘేల్, ఓ అభ్యర్థి
''నేను డ్రైవర్ పోస్ట్ కోసం దరఖాస్తు చేశాను. నేను జడ్జి పరీక్ష కోసం కూడా సిద్ధమవుతున్నాను. నాది మాధవ్ కాలేజీ. ఒక్కోసారి పుస్తకాలు కొనుగోలు చేసేందుకు కూడా డబ్బులు లేకపోయేవి. అందుకే.. నాకు ఏదైనా పని కావాలి.''
- జితేంద్ర మౌర్య, లా గ్రాడ్యుయేట్
Madhya pradesh Job Crisis: గణాంకాల ప్రకారం.. మధ్యప్రదేశ్లో 32,57,136 మంది నిరుద్యోగులు ఉన్నారు. రాష్ట్ర విద్యాశాఖలో 30,600, హోం శాఖలో 9388, ఆరోగ్య శాఖలో 8,592, రెవెన్యూ శాఖలో 9530 పోస్టులు ఖాళీగా ఉన్నాయి. మొత్తం కలిపి అన్ని విభాగాల్లో లక్షకుపైనే ఖాళీలు ఉన్నట్లు తెలుస్తోంది.
ఈ నేపథ్యంలోనే మధ్యప్రదేశ్ ముఖ్యమంత్రి శివరాజ్ సింగ్ చౌహాన్పై విమర్శలు గుప్పిస్తున్నారు అభ్యర్థులు. ఇటీవల ప్రతి సంవత్సరం లక్ష మందిని నియమించుకుంటామని సీఎం ప్రకటించిన నేపథ్యంలో.. ఉద్యోగ ప్రకటన ఏమైందని విరుచుకుపడుతున్నారు.
ఇవీ చూడండి: యూపీలో మారిన పొత్తుల సరళి.. చిన్న పార్టీలతోనే దోస్తీ ఎందుకంటే?
