తల్లి మృతదేహాన్ని ఇంట్లో ఉంచి కుమారుడు పెళ్లి చేసుకున్న ఘటన ఝూర్ఖండ్లో జరిగింది. జూలై 10న కుమారుడి వివాహం జరగాల్సి ఉండగా.. తల్లి అనారోగ్యంతో చికిత్స పొందుతూ గురువారమే మరణించింది. మృతురాలి చివరి కోరిక తన కుమారుడి పెళ్లి చేయడమే. ఈ నేపథ్యంలో తల్లి ఆఖరి కోరికను తీర్చేందుకు ఓం కుమార్ సిద్ధమయ్యాడు. శివాలయంలో సరోజ్ను పెళ్లి చేసుకుని వచ్చి తల్లి ఆశీర్వాదాలను తీసుకున్నాడు. ఈ ఘటన ధన్బాద్లోని కేందుఆడియా పోలీస్ స్టేషన్ పరిధిలో జరిగింది.
ఓం కుమార్కు, సరోజ్ అనే యువతితో కొన్ని రోజులు క్రితమే వివాహం కుదిరింది. వీరి పెళ్లి జూలై 10న చేయాలని కుటుంబ సభ్యులు నిర్ణయించారు. అయితే ఓం కుమార్ తల్లి గత కొన్ని రోజులుగా అనారోగ్యంతో బాధపడుతోంది. ఆరోగ్యం విషమించడం వల్ల గురువారం అర్థరాత్రి ఓ ప్రైవేట్ ఆసుపత్రిలో చికిత్స పొందుతూ మృతి చెందింది. తల్లి మృతదేహాన్ని ఇంటికి తీసుకొచ్చాడు ఓం కుమార్. మృతదేహాన్ని ఇంట్లో ఉంచి ఓం కుమార్ సమీపంలోని శివాలయంలో సరోజ్ను వివాహం చేసుకున్నాడు. పెళ్లయ్యాక ఓం కుమార్ తన భార్య సరోజ్తో కలిసి ఇంటికి వచ్చాడు. తల్లి కాళ్లకు మొక్కి ఆశీర్వాదాలు తీసుకున్నారు. అనంతరం అంత్యక్రియలు నిర్వహించాడు.
ఇవీ చదవండి: దూసుకెళ్లిన టమాటాల ట్రక్.. ఇంటి బయట నిద్రిస్తున్న ఆరుగురు మృతి
