ప్రభుత్వ రంగ సంస్థ ఓఎన్జీసీకి (ఆయిల్ అండ్ నేచురల్ గ్యాస్ కార్పొరేషన్) చెందిన ఓ హెలికాప్టర్ అరేబియా సముద్రంలో కుప్పకూలింది. గాల్లో ఉండగా సాంకేతిక సమస్య తలెత్తి హెలికాప్టర్ను అత్యవసరంగా రిగ్పై ల్యాండ్ చేసేందుకు ప్రయత్నించే క్రమంలో ఈ ప్రమాదం జరిగింది. ఈ దుర్ఘటనలో నలుగురు మృతి చెందారు. వీరిలో ముగ్గురు ఓఎన్జీసీ ఉద్యోగులు. ప్రమాదం సమయంలో చాపర్లో ఇద్దరు పైలట్లు సహా మొత్తం 9 మంది ఉన్నారు.
ముంబయి తీరం నుంచి 50 నాటికల్ మైళ్ల దూరంలో ఈ ప్రమాదం జరిగింది. సముద్ర తీరం నుంచి సముద్ర మధ్యలోని రిగ్పై ల్యాండ్ కావాల్సిన హెలికాప్టర్.. దానికి 1.5కిలోమీటర్ల దూరంలో ఫ్లోటర్ల ద్వారా అత్యవసరంగా ల్యాండ్ కావాల్సి వచ్చింది. ఈ సమయంలో ప్రమాదవశాత్తు కూలిపోయింది. వెంటనే అధికారులు యుద్ధప్రాతిపదికన సహాయక చర్యలు చేపట్టారు. పలువురిని సురక్షింతంగా కాపాడారు. నలుగురు మాత్రం చనిపోయారు.
సముద్రంలోని నిక్షేపాల నుంచి ఆయిల్, గ్యాస్ను వెలికి తీసేందుకు సంస్థలు రిగ్లను ఏర్పాటు చేస్తాయి. తీరం నుంచి సముద్రం మధ్యలోని రిగ్లపైకి సిబ్బంది సహా ఇతర సామగ్రి, పదార్థాలను చేరవేసేందుకు హెలికాప్టర్లను ఉపయోగిస్తుంటారు. అయితే ఇప్పుడు జరిగిన ప్రమాదానికి కచ్చితమైన కారణం ఇంకా తెలియాల్సి ఉందని ఓఎన్జీసీ అధికారులు తెలిపారు. దీనిపై దర్యాప్తు చేపట్టినట్లు పేర్కొన్నారు.
ఇదీ చదవండి: భూమిలో నోట్ల కట్టలు.. ట్రాక్టర్తో దున్నుతుంటే బయటకు.. పోలీసులు వచ్చేలోపే..
