ఆహారంలో ఉప్పు ఎక్కువైందని దాబాలో పనిచేసే వంట మనిషిని చంపేశారు. ఈ ఘటన అక్టోబర్ 26న జరగగా.. ఆలస్యంగా వెలుగులోకి వచ్చింది. ఓ సామాజిక కార్యకర్త ఇచ్చిన ఫిర్యాదు ఆధారంగా పుణె పోలీసులు దర్యాప్తు చేపట్టి.. నిందితులను అరెస్టు చేశారు.
పోలీసులు తెలిపిన వివరాల ప్రకారం.. అక్టోబర్ 26న పుణెలోని ఓ దాబాలో పనిచేస్తున్న వంటమనిషిని.. ఆహారంలో ఉప్పు ఎక్కువైందనే కారణంతో చంపేశారు ఇద్దరు నిందితులు. కాగా, ఈ విషయం చాలా రోజుల వరకు ఎవరికీ తెలియలేదు. ఆ తర్వాత అందులో పనిచేసే మరో వ్యక్తి.. తన సొంత ఊరికి వచ్చి జరిగిన విషయాన్ని స్థానిక సామాజిక కార్యకర్తకు వివరించాడు. దీంతో ఆ కార్యకర్త పోలీసులను ఆశ్రయించి జరిగింది చెప్పాడు.
సినీ ఫక్కీలో పోలీసుల వ్యూహం..
ఈ ఘటనపై కేసు నమోదు చేసి దర్యాప్తు చేపట్టిన పోలీసులు.. మొదటగా ఆ దాబా వద్దకు వెళ్లారు. అందులో భోజనం ఆర్డర్ చేసి తిన్నారు. ఈ క్రమంలో రహస్యంగా దాబా ఓనర్ ఫొటోలు తీశారు. ఆ ఫోటోలు సామాజిక కార్యకర్త ద్వారా.. అందులో పని చేసిని వ్యక్తికి పంపిచారు. అతడు నిందితులను గుర్తుపట్టాడు. అనంతరం రంగంలోకి దిగిన పోలీసులు ఇద్దరు నిందితులను అదుపులోకి తీసుకున్నారు. ఆ తర్వాత నిందితులు మృతదేహాన్ని విసిరేస్తుండగా చూసిన సాక్షి ఒకరు పోలీసులకు చెప్పాడు. మృతుడిని ప్రసన్జీత్ గోరై(35) గా, నిందితులను ఓంకార్ కెంద్రే(21) కైలేశ్ కేంద్రే(19)గా గుర్తించారు పోలీసులు. వీరిద్దరూ సోదరులని.. 'ఓంకార్ దాబా'కు ఓనర్లని తెలిపారు. మొదట నిందితులు నేరాన్ని అంగీకరించలేక పోయినా.. ఆ తర్వాత ఒప్పుకున్నారు. ఆహారంలో ఉప్పు ఎక్కువైందని అతడిని చంపేశామన్నారు నిందితులు. అనంతరం అక్టోబర్ 28న అర్ధరాత్రి మృతుడి దుస్తులు మార్చి ఓ కుంటలో వేశామని చెప్పారు. దీన్ని చూసిన ఓ వ్యక్తి మొదటి ఎవరితో చెప్పకపోయినా.. ఆ తర్వాత జరిగింది పోలీసులకు వివరించాడు.
భర్త కాళ్లూ చేతులు కట్టి.. కిరోసిన్ పోసి నిప్పు..
కుటుంబ కలహాలు, వేధింపులతో మనస్తాపానికి గురైన ఓ మహిళ.. అర్ధరాత్రి భర్తపై కిరోసిన్ పోసి నిప్పంటించింది. ఈ ఘటన ఝార్ఖండ్లోని చతరా జిల్లాలో సర్దార్ పోలీస్ స్టేషన్ పరిధిలో జైపుర్ గ్రామంలో జరిగింది. వినోద్ భారతీ అనే వ్యక్తికి, తన భార్య రుంటీ దేవీకి తరచూ ఇంట్లో గొడవలు జరుగుతుండేవి. దీంతో విసుగు చెందిన భార్య అర్ధరాత్రి.. భర్త కాళ్లు చేతులు కట్టేసి.. అతడి చూట్టూ కొన్ని దుస్తులు చుట్టింది. ఓ గదిలో వేసి అతడిపై కిరోసిన్ పోసి నిప్పంటించింది.
ఈ ఘటనలో తీవ్రంగా గాయాలపాలైన బాధితుడిని స్థానికులు ఆస్పత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని.. నిందితురాలిని అరెస్టు చేశారు. కాగా, ఇంతక ముందు కూడా నిందితురాలు వినోద్ను హతమార్చేందుకు ప్రయత్నించిందని పోలీసుల విచారణలో తెేలింది.
బాలుడి ఛాతిపై కాలు పెట్టి.. చేయి విరిగేదాకా..
బిహార్లో అమానవీయ ఘటన జరిగింది. ఓ నాలుగేళ్ల చిన్నారిని కొందరు దారుణంగా కొట్టారు. అతడి ఛాతిపై కాలుపెట్టి చేతిని విరిచారు. రిఫైనరీ ఓపీ ప్రాంతంలోని మొసాద్పుర్ అనే గ్రామంలో ఓ వేడుకలో భాగంగా డిజే ఏర్పాటు చేశారు. డ్యాన్స్ వేస్తున్న క్రమంలో శివరాజ్ కుమార్ అనే వ్యక్తి కుమారుడు కింద పడి గాయపడ్డాడు. దీనికి శివరాజ్ కుమార్ పొరుగింట్లో ఉండే ప్రియాన్షు కుమార్ అనే బాలుడే కారణమని భావించారు.
అనంతరం శివరాజ్ భార్యతో పాటు మరో ఇద్దరు నిందితులు ప్రియాన్షు ఇంటికొచ్చి దాడి చేశారు. ఆ తర్వాత అతడి ఛాతిపై కాలు పెట్టి, చేయి విరిగే వరకు అలాగే ఉంచారు. ఈ మేరకు బాలుడి తల్లి ఆర్తీ దేవీ చెప్పింది. తీవ్రంగా గాయపడిన బాలుడిని.. అతడి కుటంబ సభ్యులు ఆస్పత్రికి తరలించారు. ఈ ఘటనపై బాధితుడి తల్లి ఫిర్యాదు మేరకు కేసు నమోదు చేసుకున్న పోలీసులు.. దర్యాప్తు చేపట్టారు.
