స్వయం సమృద్ధి సాధించాలని దేశ ప్రజలకు కరోనా వైరస్ నొక్కి చెప్పిందని తెలిపారు ప్రధానమంత్రి నరేంద్ర మోదీ. గ్రామాలు, జిల్లాలు, ప్రాంతాల వారిగా స్వయం సమృద్ధి సాధించడం అత్యంత అవసరమన్నారు. నేడు జాతీయ పంచాయతీరాజ్ దినోత్సవం సందర్భంగా గ్రామ సర్పంచులు, ప్రజాప్రతినిధులతో వీడియో కాన్ఫరెన్స్ ద్వారా సమావేశమయ్యారు మోదీ.
'రెండు అడుగుల దూరంతో వైరస్ను పారదోలుదాం' అనే నినాదంతో ప్రజలను చైతన్యం చేయాలని సర్పంచ్లకు పిలుపునిచ్చారు మోదీ. ప్రజల భాగస్వామ్యంతో కరోనా వైరస్పై భారత్ పోరాడుతున్న విధానానికి ప్రపంచదేశాలు ఆకర్షితమయ్యాయని ఉద్ఘాటించారు. లాక్డౌన్ నిబంధనలను పాటించడం పట్ల ప్రజలకు అభినందనలు తెలిపారు. పరిమిత వనరులు వంటి అనేక అవాంతరాలు ఉన్నప్పటికీ దేశాన్ని కాపాడే యజ్ఞంలో ప్రజలంతా ఒక్కటిగా ముందుకు సాగుతున్నారన్నారు.
వైరస్ నియంత్రణలో గ్రామాల అభివృద్ధికి సంబంధించి తమ అభిప్రాయాలు, ఆలోచనలను ప్రధానితో పంచుకున్నారు సర్పంచులు. గ్రామ ప్రజాప్రతినిధులు వారు చేపడుతున్న చర్యలను వివరించగా.. వారి కృషిని అభినందించారు మోదీ.
గ్రామ పురోగతి సమాచారం కోసం..
వీడియో కాన్ఫరెన్స్ వేదికగా 'ఈ- గ్రామ్ స్వరాజ్ అప్లికేషన్'ను ప్రారంభించారు ప్రధాని మోదీ. గ్రామాభివృద్ధికి సంబంధించిన పలు కీలక అంశాలు ఇందులో అందుబాటులో ఉంచనున్నారు. ఆదాయ, వ్యయాలు.. వివిధ పథకాల పురోగతిపై సమాచారం ఉండనుంది. దీని ద్వారా గ్రామంలో చేపడుతున్న అభివద్ధి కార్యక్రమాలు ఎక్కడివరకు సాగాయనే అంశాలు మొబైల్లోనే చూడొచ్చు.
సరిహద్దుల కోసం స్వామిత్వ్ యోజన..
నవీన సాంకేతికతను ఉపయోగించడం ద్వారా భూ సరిహద్దుల నిర్ధరణను చేపట్టే 'స్వామిత్వ్ యోజన'ను కూడా ప్రారంభించారు ప్రధాని మోదీ. భూవివాదాల పరిష్కారం లక్ష్యంగా ఈ పథకాన్ని ప్రవేశపెట్టారు. డ్రోన్ సాంకేతికత ద్వారా పనిచేయనున్న ఈ కార్యక్రమాన్ని ఉత్తర్ప్రదేశ్, మధ్యప్రదేశ్, కర్ణాటక, మహారాష్ట్ర, గుజరాత్, ఉత్తరాఖండ్లలో ప్రయోగాత్మకంగా చేపట్టనున్నారు. డ్రోన్ ద్వారా ప్రతి ఒక్కరి స్థలాల చిత్రాలు రూపొందించి.. టైటిల్ డీడ్లను ఏర్పాటు చేయనున్నారు.
ఇదీ చూడండి: కరోనాపై గొప్ప సందేశమిస్తోన్న 6 నెలల చిన్నారి!
