తాడిపత్రిలో జేసీ ప్రభాకర్ రెడ్డి యువ చైతన్య యాత్రకు అనూహ్య స్పందన

Former MLA JC Prabhakar Reddy Yuva Chaitanya Yatra: అనంతపురం జిల్లా తాడిపత్రిలో మాజీ ఎమ్మెల్యే జేసీ ప్రభాకర్ రెడ్డి నిర్వహిస్తున్న యువ చైతన్య యాత్రకు ప్రజల నుంచి అనూహ్య స్పందన వస్తోంది. ఇప్పటికే మూడు మండలాల్లో యువ చైతన్య యాత్ర పూర్తి చేసిన జేసీ ప్రభాకర్ రెడ్డీ వైసీపీ ప్రభుత్వ అక్రమాలపై, కుంటుపడిన అభివృద్ధిపై ప్రజలను చైతన్యపరుస్తూ ముందుకు సాగుతున్నారు. తాడిపత్రి మండలం చుక్కలూరులో యువ చైతన్య నిర్వహిస్తున్న జేసీకి యువత నుంచి పెద్దఎత్తున స్పందన వచ్చింది. యువతీ, యువకులు దారివెంట పాదయాత్రగా వెళ్తున్న జేసీని కలిసి ఈ సారి తెలుగుదేశం పార్టీని గెలిపిస్తామని, అస్మిత్ రెడ్డికే తమ మద్దతు అంటూ యాత్రకు మద్దతు ప్రకటించారు. దారిపొడవునా మహిళలు జేసీకి హారతులు పడుతూ స్వాగతం పలుకుతున్నారు. తాను ఎవరినీ ఓటు అడగటానికి రాలేదని, కేవలం కుంటుపడిన అభివృద్ధి గురించి, మీ పిల్లల భవిష్యత్ అంధకారం కాకుండా ఉండాలని చెప్పటానికే వచ్చినట్లు చెబుతున్నారు. వివిధ పార్టీల కార్యకర్తలు తెలుగుదేశం పార్టీలో చేరడానికి ముందుకు వస్తుండగా, జేసీ ప్రభాకర్ రెడ్డి కండువా కప్పి ఆహ్వానిస్తున్నారు.