మహేశ్​ బాబు కుమార్తె సితార పేరుతో ఇన్వెస్ట్​మెంట్​ లింకులు - స్పందించిన జీఎంబీ సంస్థ

Fake Instagram Account On Sitara Ghattamaneni : రాష్ట్రవ్యాప్తంగా సైబర్​ నేరాలు రోజురోజుకూ మితిమీరిపోతున్నాయి. వాట్సాప్, ఫేస్‌బుక్, ఇన్‌స్టాగ్రామ్ లాంటి సోషల్ మీడియా ప్లాట్‌ఫాంలపై ఫేక్ అకౌంట్లు క్రియేట్ చేసి క్యూ ఆర్​ కోడ్లు, లింకులు, పంపిస్తూ జనం నుంచి డబ్బులను దోచేస్తున్నారు. కొన్నిసార్లు సినీతారలకూ ఇది తప్పడం లేదు. సామాజిక మాధ్యమాల్లో సెలబ్రిటీల పేరుతో నకిలీ ఖాతాలు తెరచి పలువురి నుంచి డబ్బు నొక్కేస్తున్నారు. అత్యవసరం అంటూ మెసేజ్​లు పెడుతూ నగదు దోచేస్తున్నారు. 

Fake Account On Mahesh Babu Daughter : తాజాగా నటుడు మహేశ్​బాబు కుమార్తె ఘట్టమనేని సితార పేరుతో కొందరు నేరగాళ్లు నకిలీ ఇన్‌స్టాగ్రామ్ ఖాతాలు తెరిచారు. వాటి ద్వారా ఇన్‌స్టాగ్రామ్​లో పలువురికి ఇన్వెస్ట్​మెంట్, ట్రేడింగ్ లింకులు పంపుతున్నట్లు జీఎంబీ ఎంటర్‌టైన్మెంట్స్ సంస్థ గుర్తించింది. ఇలాంటివి నమ్మొద్దని వెల్లడించింది. దీనిపై పోలీసులకు ఫిర్యాదు చేయనున్నట్లు తెలిపింది. సెలబ్రిటీల పేరుతో ఇలాంటి లింకుల పట్ల అప్రమత్తంగా ఉండాలని సంస్థ పేర్కొంది. ఈ విషయాన్ని తమ ట్విట్టర్(ఎక్స్) ఖాతాలో పోస్ట్ చేసింది.