జనం బుద్ధిచెప్పినా బీఆర్ఎస్​కు బుద్ధిరాలే - అసెంబ్లీలో సీఎం రేవంత్​ - Revanth on Tribal Areas Development

CM Revanth on Tribal Areas : తండాల్లో, గూడెంలలో కనీస సౌకర్యాలు ఏర్పాటు చేసినప్పుడే రాష్ట్రంలో అభివృద్ధి జరుగుతుందని తమ ప్రభుత్వం బలంగా భావిస్తుందని ముఖ్యమంత్రి రేవంత్​రెడ్డి అన్నారు. బుధవారం రోజున తెలంగాణలో జరిగిన శాససభ రెండోరోజు సమావేశాల్లో తండాల్లో, గూడేల్లో ఉన్న విద్యుత్​, విద్య, తదితర సమస్యలపై సీఎం మాట్లాడారు. గత ప్రభుత్వం తండా ప్రజలకు సౌకర్యం కల్పించడంలో విఫలమైందని విమర్శించారు. బీఆర్​ఎస్​ హయాంలో ఏడు లక్షల ఇళ్లకు తాగునీరు ఇవ్వలేదని ఆరోపించారు.

బీఆర్​ఎస్​ నేతల తీరెరిగిన ప్రజలు ఎన్నికల్లో ఓటుతో సరైన గుణపాఠం చెప్పినప్పటికీ మారట్లేదని సభా సాక్షిగా సీఎం రేవంత్​ ధ్వజమెత్తారు. బీఆర్​ఎస్​ నేతలకు మంచిబుద్ధి కలగాలని ప్రార్థిస్తున్నానని తెలిపారు. రోడ్లు సరిగాలేక ప్రమాదాలు జరిగి అనేకమంది చనిపోతున్నారని ఆవేదన వ్యక్తం చేశారు. పంచాయతీలుగా మారిన తండాలకు రోడ్లు వేస్తామని హామీ ఇచ్చారు. అన్ని తండాలకు మండల కేంద్రం నుంచి బీటీ రోడ్లు వేస్తామని, విద్యుత్​ సౌకర్యం కల్పిస్తామని తెలిపారు.