టోల్​ గేట్ ఉద్యోగి ​పైనుంచి దూసుకెళ్లిన కారు - Car Crushed Worker Viral Video

Car Crushed Worker Viral Video : ఉత్తర్​ప్రదేశ్​ హాపుర్ జిల్లాలో ఓ కారు బీభత్సం సృష్టించింది. టోలో ప్లాజాలో విధులు నిర్వర్తిస్తున్న ఉద్యోగిని అతివేగంతో ఢీకొట్టింది. దీంతో అతడు తీవ్రగాయాలపాలై ఆస్పత్రిలో చికిత్స పొందుతున్నాడు. ప్రస్తుతం అతడి ఆరోగ్య పరిస్థితి విషమంగా ఉన్నట్లు అధికారులు తెలిపారు. ఈ ఘటనకు సంబంధించిన సీసీటీవీ దృశ్యాలు సోషల్ మీడియాలో వైరల్​గా మారాయి.

పోలీసులు తెలిపిన వివరాల ప్రకారం, జిల్లాలోని చిత్రకూట్​కు ప్రాంతానికి చెందిన హేమరాజ్ అనే వ్యక్తి చిజరాసి టోల్​ప్లాజాలో పనిచేస్తున్నాడు. గురువారం వేకువజామున మూడు గంటలకు ఓ కారు టోల్​ప్లాజా వైపు వచ్చింది. ఆ సమయంలో హేమరాజ్ విధుల్లో ఉన్నాడు. ట్యాక్స్ చెల్లించకుండా తప్పించుకునేందుకు సదరు డ్రైవర్​ కారును ముందుకు పోనిచ్చాడు. దీంతో కారును ఆపేందుకు హేమరాజ్ ప్రయత్నించాడు. 

అదే సమయంలో అతివేగంతో హేమరాజ్​ను ఢీకొని దూసుకెళ్లింది కారు. దీంతో అతడు తీవ్రంగా గాయపడి ఎగిరిపడ్డాడు. వెంటనే స్థానికులు, సహద్యోగులు హేమరాజ్​ను చికిత్స కోసం స్థానిక ఆస్పత్రికి తరలించారు. అయితే తమకు ఎలాంటి ఫిర్యాదు అందలేదని పోలీసులు తెలిపారు. సీసీటీవీ ఫుటేజ్ ఆధారంగా చర్యలు తీసుకుంటామని చెప్పారు.