కాంగ్రెస్‌పై కోపంతో బీజేపీకు ఓటేస్తే పెనం నుంచి పొయ్యిలో పడ్డట్లే : హరీశ్‌రావు - Harish Rao Comments on Congress

Harish Rao Comments on Congress Party : ధాన్యం కొనుగోళ్లలో తరుగు పెట్టిన కాంగ్రెస్‌ పార్టీకి ఓట్లలో తరుగు పెట్టాలని మాజీ మంత్రి, బీఆర్​ఎస్​ ఎమ్మెల్యే హరీశ్‌రావు పిలుపునిచ్చారు. మెదక్‌ ఎంపీ అభ్యర్థి వెంకట్రామిరెడ్డికి మద్దతుగా ఎన్నికల ప్రచారం నిర్వహించిన హరీశ్‌రావు, బీజేపీకు ఓటేస్తే పెనం మీది నుంచి పొయ్యిలో పడ్డట్లేనని హెచ్చరించారు. పదేళ్లుగా కేంద్రంలోని అధికారంలో ఉన్న బీజేపీ తెలంగాణకు ఏం చేసిందని ప్రశ్నించారు. కాంగ్రెస్​ నాయకులు ఉద్ధరిస్తారని ఓటేస్తే, ఉద్దెర మాటలు చెబుతున్నారని దుయ్యబట్టారు.

BRS Election Campaign in Medak : కేసీఆర్‌ బస్సుయాత్రతో కాంగ్రెస్‌ నేతలకు వణుకు పుట్టిందని, అందుకే ఆయనకు భయపడి సీఎం దేవుళ్లుపై ఒట్లు పెడుతున్నారని హరీశ్​రావు విమర్శించారు. రేవంత్‌రెడ్డి దిల్లీకి వెళ్లి మోదీతో ములాఖత్ అయ్యారని ఆరోపించారు. రూ.2 లక్షల రుణమాఫీ, 6 గ్యారంటీలు పూర్తి చేస్తే రాజీనామాకు సిద్ధమని పునరుద్ఘాటించారు. ఈ విషయమై అమరవీరుల స్థూపం వద్దకు రమ్మంటే రేవంత్ రాలేదని దుయ్యబట్టారు. కాంగ్రెస్‌ పాలనలో కనీసం 14 గంటల కరెంట్‌ కూడా రావట్లేదని ధ్వజమెత్తారు. అబద్ధాలు చెప్పి గద్దెనెక్కిన రేవంత్‌రెడ్డికి పార్లమెంట్‌ ఎన్నికల్లో గుణపాఠం చెప్పాలని అన్నారు.