బీజేపీ కార్యాలయంలో ఉద్రిక్తత - బీబీ పాటిల్​కు టికెట్​ ఇవ్వొద్దంటూ నినాదాలు

BJP Workers Protest Against Bibi Patel Join : బీబీ పాటిల్​ను బీజేపీలో చేర్చుకోవడం పట్ల జహీరాబాద్​ బీజేపీ శ్రేణులు అసహనం వ్యక్తం చేశారు. ఆయనను చేర్చుకోవడాన్ని వ్యతిరేకిస్తూ జైపాల్​ రెడ్డి అనుచరులు నిరసనలు చేపట్టారు. హైదరాబాద్​లోని బీజేపీ కార్యాలయంలో రాష్ట్ర అధ్యక్షుడు కిషన్​ రెడ్డి ముందు నిరసన తెలిపారు. జహీరాబాద్​ టికెట్​ జైపాల్​ రెడ్డికి ఇస్తేనే గెలుస్తారని, అదే బీబీ పాటిల్​ పదేళ్లలో ఒక్క అభివృద్ధి కార్యక్రమం చేయలేదని ఆవేదన వ్యక్తం చేశారు. 

అదే జహీరాబాద్​ టికెట్​ ఆశిస్తున్న మాజీ మంత్రి బాగా రెడ్డి కుమారుడు జైపాల్​ రెడ్డికి ఇస్తే ఈ స్థానంలో కచ్చితంగా గెలుస్తారని ధీమా వ్యక్తం చేశారు. అంతేగానీ బీబీ పాటిల్​కు టికెట్​ ఇవ్వొద్దంటూ నినాదాలు చేశారు. నియోజకవర్గాన్ని అభివృద్ధి చేయని సభ్యుడు బీబీ పాటిల్​ మాకొద్దంటూ ఫ్లకార్డులతో ఆందోళన వ్యక్తం చేశారు. ఇదే విషయాన్ని కిషన్​రెడ్డికి చెబితే ఎమ్మెల్యే కార్యాలయానికి వచ్చి కలవాలని సూచించారు. ఎట్టి పరిస్థితుల్లోనూ బీబీ పాటిల్​ చేరికను ఒప్పుకునే పరిస్థితి లేదని బీజేపీ శ్రేణులు భీష్మించుకొని కూర్చుకున్నారు.