టీడీపీ ప్రభుత్వంలో కడప స్టీల్​ ప్లాంట్​​ను సాధించుకుంటాం : భూపేశ్​ రెడ్డి

Bhupesh Reddy Padayatra for Kadapa Steel in YSR District : కడప స్టీల్​ ప్లాంట్​ సాధన కోసం వైఎస్సార్​ జిల్లా జమ్మలమడుగు ఇన్​ఛార్జ్​ భూపేశ్​ రెడ్డి పాదయాత్ర చేపట్టారు. కడప ఉక్కు కర్మాగారానికి రెండుసార్లు శంకుస్థాపన చేసి పనులు చేపట్టకుండా సీఎం జగన్ మోహన్​ రెడ్డి యువతను మోసం చేశారని ఆగ్రహం వ్యక్తం చేశారు. భూపేశ్​ రెడ్డి చేపట్టిన పాదయాత్ర జమ్మలమడుగు నుంచి పెద్ద దండ్లూరు వరకు కొనసాగుతుంది. ఈ కార్యక్రమానికి నియోజకవర్గంలోని ఆరు మండలాల టీడీపీ శ్రేణులు, జనసేన నేతలు హాజరయ్యారు.

సీఎం జగన్​ అధికార పగ్గాలు చేపట్టి ఐదేళ్ల అవుతున్న కడప స్టీల్​ ప్లాంట్​కు​ రెండు సార్లు శంకుస్థాపన చేశారు, కానీ నిర్మాణ పనులు మాత్రం చేపట్టాలేదని భూపేశ్​ రెడ్డి ధ్వజమెత్తారు. జమ్మలమడుగు ప్రాంతంలో ఉక్కు కర్మాగారాన్ని ఏర్పాటు చేస్తే ఒక్క కడప జిల్లాకే కాకుండా రాయలసీమ ప్రాంతవాసులందరికి ఉపాధి దొరుకుతుందని పేర్కొన్నారు. రానున్న ఎన్నికల్లో టీడీపీ అధికారంలోకి రాగానే కడప ఉక్కును సాధించుకుందామని పిలుపునిచ్చారు.