తెలుగు రైతు అధ్యక్షుడు మర్రెడ్డి శ్రీనివాస్‌రెడ్డిపై హత్యాయత్నం - దాడిని ఖండించిన చంద్రబాబు

Attack on Telugu Rythu President Marreddy Srinivasa Reddy: ప్రకాశం జిల్లా ఒంగోలులో తెలుగు రైతు రాష్ట్ర అధ్యక్షుడు మర్రెడ్డి శ్రీనివాస్‌రెడ్డిపై హత్యాయత్నం జరిగింది. తీవ్రంగా గాయపడిన అతన్ని ఒంగోలులోని ఆస్టర్‌ రమేశ్‌ ఆసుపత్రికి తరలించి చికిత్స అందిస్తున్నారు. జయరాం సెంటర్‌లోని జిమ్స్‌ ఆసుపత్రిలో డాక్టర్‌ రామచంద్రారెడ్డితో ఆర్థిక లావాదేవీలపై చర్చిస్తుండగా, ఆయన అనుచరులు ఒక్కసారిగా మర్రెడ్డిపై దాడికి దిగారు. 

ఒక్కసారిగా దాడి చేయడంతో మర్రెడ్డి శ్రీనివాస్‌రెడ్డికి తీవ్ర గాయాలయ్యాయి.  ప్రస్తుతం ఆయన ఆరోగ్య పరిస్థితి నిలకడగా ఉన్నట్టు సమాచారం. చర్చల కోసం పిలిచి పథకం ప్రకారం దాడికి పాల్పడినట్లు అనుమానిస్తున్నారు. మర్రెడ్డి శ్రీనివాసరెడ్డిపై డాక్టర్ రామచంద్రారెడ్డి, బాలు అనే వ్యక్తి రాడ్లతో దాడి చేశారని సీఐ లక్ష్మణ్‌ తెలిపారు. 

Chandrababu Condemns Attack on Marreddy Srinivasa Reddy: తెలుగు రైతు విభాగం రాష్ట్ర అధ్యక్షుడు మర్రెడ్డి శ్రీనివాస్ రెడ్డిపై హత్యాయత్నాన్ని తెలుగుదేశం అధినేత చంద్రబాబు ఖండించారు. ప్రకాశం జిల్లా టీడీపీ నేతలతో మాట్లాడిన చంద్రబాబు, మర్రెడ్డి ఆరోగ్య పరిస్థితిపై ఆరా తీశారు. మెరుగైన చికిత్స అందేలా చూడాలని నేతలకు చంద్రబాబు సూచించారు.