World Backup Day 2024 : ప్రస్తుత రోజుల్లో డేటా అనేది చాలా ముఖ్యం. సంపద సృష్టికి ప్రధాన ఇంధనంగా డేటా మారిపోయింది. వ్యాపార కార్యకలాపాలు సజావుగా సాగడానికి ఈ డేటా చాలా అవసరం. అందుకే సైబర్ దాడుల ముప్పు నుంచి డేటాను కాపాడుకోవాల్సిన అవసరం ఎంతైనా ఉంది. గణాంకాల ప్రకారం, 2023లో డేటా లీకేజ్, డేటా కాంప్రమైజింగ్ వల్ల ఒక్క యూఎస్లోనే దాదాపు 353 మిలియన్ల మంది వ్యక్తులు తీవ్రమైన ఆర్థిక నష్టాలకు గురయ్యారు. మార్చి 31వ తేదీన 'వరల్డ్ బ్యాకప్ డే' సందర్భంగా డేటా బ్యాకప్, డేట్ బ్రీచింగ్, క్లౌడ్ బేస్డ్ బ్యాకప్గురించి పలు వివరాలు తెలుసుకుందాం.
డేటా అమ్ముకుంటున్నాయ్!
ప్రపంచవ్యాప్తంగా ఉన్న పెద్ద పెద్ద ఆస్పత్రులు డేటా ఉల్లంఘనలకు పాల్పడ్డాయి. దీనితో యూజర్లు, పేషెంట్లు భారీగా ఆర్థికంగా నష్టపోయారు. దీనితో నియంత్రణ సంస్థలు నిబంధనలు ఉల్లంఘించిన సంస్థలపై భారీ జరిమానాలు విధించాయి. చట్టపరమైన చర్యలు తీసుకున్నాయి. బాధితులకు పరిహారం అందించేలా చేశాయి. కానీ బడా కంపెనీలు ఇలా డేటా ఉల్లంఘనలకు పాల్పడుతుండడం తీవ్రమైన దిగ్భ్రాంతి కలిగించే విషయం.
డేటా బ్రీచింగ్
వ్యక్తిగత లేదా బడా వ్యాపార సంస్థల డేటా బ్రీచ్ అయితే అది తీవ్రమైన ఆర్థిక నష్టాలకు దారితీస్తుంది. ముఖ్యంగా వ్యాపారాలు దెబ్బతింటాయి. స్టాక్ మార్కెట్లో సదరు కంపెనీల విలువలు భారీగా తగ్గిపోతాయి. చివరకు ఇది పెట్టుబడిదారులకు తీవ్రమైన నష్టాన్ని మిగుల్చుతుంది. పైగా మార్కెట్లు సంస్థల పలుకుబడి దెబ్బతింటుంది. పెద్దపెద్ద సంస్థలైతే వీటిని తట్టుకోగలుగుతాయి. కానీ సాధారణ, చిన్న వ్యాపారులు పూర్తిగా దెబ్బతింటారు. చివరకు తమ బిజినెస్ను పూర్తిగా మూసుకోవాల్సి వస్తుంది. పలు గణాంకాల ప్రకారం, అమెరికాలో డేటా బ్రీచింగ్ వల్ల ఒక్క ఏడాదిలోనే దాదాపు 70 శాతం మంది చిన్నవ్యాపారులు తీవ్రమైన నష్టాలకు గురై పుర్తిగా వ్యాపారాన్ని మూసివేశారు.
ఆరోగ్య రంగం మరింత దారుణం
వైద్య, ఆరోగ్య రంగాలకు సంబంధించిన డేటా చాలా సున్నితమైనది. ఇక్కడ కనుక డేటా కాంప్రమైజ్ అయితే ప్రభుత్వ సేవలకు తీవ్రమైన అంతరాయం ఏర్పడుతుంది. ఫలితంగా రోగుల ప్రాణాలకే ముప్పు వాటిల్లే ప్రమాదం ఉంటుంది. దీని వల్ల సదరు ఆస్పత్రులపై, ప్రభుత్వ సంస్థలపై ప్రజలు విశ్వాసం కోల్పోయే ప్రమాదం ఉంది.
వ్యక్తిగత డేటా భద్రత
వ్యాపార సంస్థల విషయంలోనే కాదు, వ్యక్తిగత డేటా కూడా చాలా విలువైనది. సైబర్ నేరగాళ్లు సాధారణ పౌరులను టార్గెట్ చేసుకుని వాళ్ల డేటాను కాజేస్తున్నారు. వారిని ఆర్థికంగా, మానసికంగా దోచుకుంటున్నారు. మరికొన్ని సందర్భాల్లో విలువైన డేటాను పౌరులు పోగొట్టుకుని, తరువాత దానిని తిరిగి రికవరీ చేసుకోలేక ఇబ్బంది పడుతున్నారు. ఇలాంటి సమస్యలకు చెక్ పెట్టాలంటే, డేటా బ్యాకప్ ఫెసిలిటీ తప్పనిసరి. అందుకే వీటన్నింటినీ ప్రజలకు, సంస్థలకు గుర్తు చేయడానికి ప్రత్యేకంగా మార్చి 31న 'వరల్డ్ బ్యాకప్ డే'ను నిర్వహిస్తున్నారు.
క్లౌడ్ బేస్డ్ బ్యాకప్
సాధారణంగా మనం కంప్యూటర్, ల్యాప్టాప్, ఫోన్, పెన్డ్రైవ్ లాంటి పలు డివైజ్ల్లో డేటాను సేవ్ చేసుకుంటాం. లేదా ఎక్స్టర్నల్ హార్డ్ డ్రైవ్స్లో ఫైల్స్ను ఉంచుకుంటాం. ఇవి ఫిజికల్గా మన దగ్గరే ఉంటాయి కనుక ఎలాంటి ఇబ్బంది రాదు. ఒకవేళ ఇవే పోతే, మన విలువైన డేటాను కోల్పోవాల్సి వస్తుంది. పెద్ద పెద్ద సంస్థల వద్ద భారీ డేటా ఉంటుంది. దీనిని హార్డ్డ్రైవ్స్లో సేవ్ చేయడం కుదరని పని. అందుకే వీటన్నింటికీ పరిష్కారం క్లౌడ్ బేస్డ్ బ్యాకప్ ఫెసిలిటీ అందుబాటులో ఉంది.
ఈ క్లౌడ్ బేస్డ్ బ్యాకప్ వల్ల మీరు ఎంత పెద్ద డేటాను అయినా సురక్షితంగా ఉంచుకోవచ్చు. దానిని మీకు నచ్చినట్లు వినియోగించుకోవచ్చు. అవసరమైతే బ్యాకప్ చేసుకోవచ్చు. మారుతున్న వ్యాపార అవసరాలకు అనుగుణంగా ఈ క్లౌడ్ బేస్డ్ బ్యాకప్ ఫెసిలిటీని ఉపయోగించుకోవచ్చు.
క్లౌడ్ బేస్డ్ బ్యాకప్ వల్ల కలిగే ప్రయోజనాలు
- అన్లిమిటెడ్ స్కేలబిలిటీ : మీరు ఎలాంటి అదనపు రుసుములు చెల్లించకుండా, ఎంత పెద్ద డేటా అయినా క్లౌడ్లో సేవ్ చేసుకోవచ్చు.
- ఎఫీషియెన్సీ : క్లౌడ్ బ్యాకప్ అనేది పూర్తి స్వయంచాలకంగా పనిచేస్తుంది. కనుక మాన్యువల్గా పనిచేయాల్సిన అవసరం ఉండదు. బ్యాకప్ ఫ్రీక్వెన్సీని సెట్ చేసుకోవడం ద్వారా, మీ డేటాను ఎల్లప్పుడూ సురక్షితంగా ఉంచుకోవచ్చు.
- ఎక్కడి నుంచైనా యాక్సెస్ : క్లౌడ్లో డేటా సేవ్ చేయడం వల్ల మీరు ఎక్కడి నుంచైనా డేటాను యాక్సెస్ చేయవచ్చు. అందువల్ల మీ టీమ్ ఎక్కడ ఉన్నా, సురక్షితంగా, హాయిగా పనిచేసుకోవచ్చు. మీ టీమ్ మెంబర్స్ మధ్య ఫైల్స్ను షేర్ చేసుకోవచ్చు. ఎలాంటి ఇబ్బంది లేకుండా కమ్యునికేషన్స్ జరుపుకోవచ్చు.
- సెక్యూరిటీ : పటిష్టమైన ఎన్క్రిప్షన్, భద్రతా ప్రోటోకాల్స్ ఉండడం వల్ల క్లౌడ్ బేస్డ్ బ్యాకప్కు సెక్యూరిటీ పరంగా ఎలాంటి రిస్క్ ఉండదు. ముఖ్యంగా ప్రైవేట్ సర్వర్లలోని సమాచారం దుర్వినియోగం కాకుండా భద్రంగా ఉంటుంది. మీ సిస్టమ్ వైఫల్యమైనా, డేటా నష్టపోయినా, దానిని క్లౌడ్ నుంచి సులువుగా బ్యాకప్ చేసుకోవడానికి వీలవుతుంది. అందువల్ల సైబర్ ఎటాక్లు జరిగినా, కంపెనీల విలువైన డేటా పోకుండా సురక్షితంగా ఉంటుంది.
వ్యక్తిగతంగా మనకు కూడా ఈ క్లౌడ్ బేస్డ్ బ్యాకప్ ఎంతగానో ఉపయోగపడుతుంది. సైబర్ నేరాలు విపరీతంగా పెరిగిపోతున్న నేటి కాలంలో మన డేటాను సురక్షితంగా క్లౌడ్లో సేవ్ చేసుకోవడం ఎంతైనా అవసరం. అప్పుడే మన డేటా చోరీకి గురైనా, లేదా హార్డ్ డ్రైవ్ల్లోని సమాచారం డిలీట్ అయినా, దానిని సులువుగా రికవరీ చేసుకోగలం. మన డిజిటల్ అసెట్స్ను కాపాడుకోగలం.
OpenAI న్యూ 'వాయిస్ క్లోనింగ్ టెక్నాలజీ' - రిలీజ్ చేస్తే రిస్కే! - OpenAI Voice Engine
