5 Tips To Secure Your WhatsApp Account : నేడు వాట్సాప్ వాడని వారంటూ లేరంటే అది అతిశయోక్తి కాదు. చాలా సులువుగా పర్సనల్ చాట్లు చేయడానికి, ఇతరులతో కమ్యునికేట్ కావడానికి వీలుగా ఉండడమే ఇందుకు కారణం. అయితే సైబర్ దాడులు పెరుగుతున్న నేటి కాలంలో, మీ వాట్సాప్ అకౌంట్ను సేఫ్గా ఉంచుకోవడం చాలా అవసరం. అందుకే ఈ ఆర్టికల్లో మీ వాట్సాప్ ఖాతాను సురక్షితంగా ఉంచుకునేందుకు అవసరమైన 5 టిప్స్ గురించి తెలుసుకుందాం.
1. టూ-స్టెప్ వెరిఫికేషన్ మస్ట్!
మీ వాట్సాప్ అకౌంట్కు కచ్చితంగా 'రెండు అంచెల ధ్రువీకరణ' (టూ-స్టెప్ వెరిఫికేషన్)ను ఎనేబుల్ చేసుకోవాలి. అలాగే దానికి పటిష్టమైన 6-అంకెల పిన్ (PIN)ను పెట్టుకోవాలి. ఆ పిన్ ఎవరూ ఊహించలేని విధంగా, చాలా పటిష్టంగా ఉండేలా చూసుకోవాలి. మీరు ఏదైనా కొత్త డివైజ్లో, లేదా వేరేవాళ్ల డివైజ్లో వాట్సాప్ ఉపయోగించినప్పుడు, ఎస్ఎంఎస్ ద్వారా వెరిఫికేషన్ కోడ్ వచ్చేలా చూసుకోవాలి. అప్పుడే మీ ఖాతా సురక్షితంగా ఉంటుంది.
2. ఫింగర్ప్రింట్/ ఫేస్ ఐడీ లాక్
మీ వాట్సాప్ చాట్ ఎవరూ చూడకుండా ఉండాలంటే, మీ ఫింగర్ప్రింట్/ ఫేస్ ఐడీ లాక్ను ఎప్పుడూ యాక్టివ్గా ఉంచుకోవాలి. ఇలా చేయడం వల్ల, ఇతరులు ఎవ్వరూ మీ అనుమతి లేకుండా, మీ వాట్సాప్ చాట్ను చూడలేరు.
3. కంట్రోల్లో ఉంచుకోండి!
మీ వాట్సాప్ ప్రొఫైల్ ఫొటో, స్టేటస్, లాస్ట్ సీన్ స్టేటస్లను ఎవరెవరు చూడాలో మీరే నిర్ణయించుకోవాలి. మీ కాంటాక్ట్స్లో లేనివారు, అపరిచితులు మీ పర్సనల్ విషయాలు చూడకుండా మీరే స్వయంగా సెట్టింగ్స్ చేసుకోవాలి. ఇందుకోసం వాట్సాప్ ప్రైవసీ సెట్టింగ్స్లోకి వెళ్లి, తగు మార్పులు చేసుకోవాలి.
4. ఫిషింగ్ లింక్స్పై క్లిక్ చేయవద్దు!
వాట్సాప్లో చాలా లింక్స్ వస్తుంటాయి. వాటిలో ఫిషింగ్ లింక్స్ కూడా ఉంటాయి. వాటిపై క్లిక్ చేస్తే, మీ డేటా మొత్తం కోల్పోయే ప్రమాదం ఉంటుంది. అందుకే వాట్సాప్కు వచ్చే అనుమానాస్పద లింక్లను ఓపెన్ చేయకూడదు. తెలియని నంబర్ల నుంచి వచ్చే లింక్లపై, అత్యవసరం అంటూ వచ్చే అభ్యర్థనలపై, నమ్మశక్యం కానీ ఆఫర్ల పేరుతో వచ్చే లింక్లపై క్లిక్ చేయకూడదు. ఇలాంటి వాటిపై వెంటనే వాట్సాప్నకు రిపోర్ట్ చేయాలి.
5. లింక్డ్ డివైజ్లను సమీక్షించాల్సిందే!
మీ వాట్సాప్ ఖాతా ఏయే డివైజ్ల్లో యాక్టివ్గా ఉందో ట్రాక్ చేయడం చాలా ముఖ్యం. వాస్తవానికి వాట్సాప్లోనే మీరు ఏయే డివైజ్ల్లో లాగిన్ అయి ఉన్నారో, ఆ జాబితా కనిపిస్తుంది. ఒక వేళ ఆ జాబితాలో మీకు తెలియని డివైజ్లు ఉన్నా, లేదా అనధికారికంగా ఎవరైనా మీ వాట్సాప్ను వాడుతున్నట్లు గమనించినా, వెంటనే దాని నుంచి లాగ్అవుట్ కావాలి. ముఖ్యంగా పబ్లిక్ కంప్యూటర్లలో వాట్సాప్ వాడుతున్న వాళ్లు, ఈ టిప్ పాటించి, తమ ఖాతాను సురక్షితంగా ఉంచుకోవాలి.
